Fengu styrk til uppgræðslu Valþjófstaðarfjalls og nágrennis

Fimmtán verkefni hlutu um-hverfisstyrki úr Samfélagssjóði Landsbankans í gær.

Fimm verkefni fengu 500 þúsund krónur hvert og tíu verkefni 250 þúsund krónur hvert, samtals fimm milljónir króna.

Þetta var í sjöunda sinn sem Landsbankinn veitir umhverfisstyrki úr Samfélagssjóði bankans en í ár bárust um 70 umsóknir.

Meðal þeirra styrkþega eru Björn Halldórsson og Gunnlaugur Sigurðsson. Styrkurinn, sem er 250.000 kr. er veittur til uppgræðslu Valþjófsstaðafjalls og nágrennis í Núpasveit.

Unnið hefur verið að uppgræðslu mela og rofabarða á Valþjófsstöðum síðan um miðja síðustu öld og markmiðið er að uppgræðslusvæðið verði sjálfbært, þ.e. að gróður drepist ekki þótt áburðadreifingu sé hætt. Einnig stendur til að girða meira til að létta búfjárbeit á verst förnu svæðunum.

Umhverfisstyrkjum Landsbankans er ætlað að styðja við verkefni á sviði umhverfismála og náttúruverndar og dómnefnd leitast við að velja metnaðarfull verkefni sem hafa skýra þýðingu fyrir íslenska náttúru og vistkerfið. Styrkirnir byggja á stefnu Landsbankans um samfélagslega ábyrgð þar sem fram kemur m.a. að bankinn hyggist flétta umhverfismál, efnahagsmál og samfélagsmál saman við rekstur sinn.

Í dómnefnd sátu Dr. Brynhildur Davíðsdóttir, dósent í umhverfis- og auðlindafræðum við Háskóla Íslands, Finnur Sveinsson, sérfræðingur í samfélagsábyrgð og dr. Guðrún Pétursdóttir, forstöðumaður Stofnunar Sæmundar fróða um sjálfbæra þróun við Háskóla Íslands, en hún var jafnframt formaður nefndarinnar.

Dr. Guðrún Pétursdóttir, formaður dómnefndar, Gunnlaugur Sigurðsson og Lilja Björk Einarsdóttir, bankastjóri Landsbankans.

Hér má sjá alla styrkþega