Dönsuðu, sungu, brostu og svitnuðu til styrktar góðu málefni

Yfir 30 konur dönsuðu Zumba í höllinni.

Bleikt zumbapartý var haldið í íþróttahöllinni sl. laugardag þar sem á fjórða tug kvenna dansaði zumba til styrktar góðu málefni.

"Ég ákvað þegar ég náði mér í þjálfararéttindin að ég skyldi einhvern tímann bjóða í bleikt zumbapartý og ekki bara til hafa sjóðheitt og skemmtilegt partý heldur einnig að láta gott af mér leiða í leiðinni.  

Og lét ég verða af því á laugardaginn og fór mætingin langt fram úr mínum björtustu vonum og söfnuðust rúmlega 80 þúsund krónur". Segir Jóhanna Svava Sigurðardóttir zumbakennari en peningurinn rennur til Krabbameinsfélags Suður-Þingeyinga.

En hvað er Zumba ?

"Zumba er sambland af dansi og líkamsrækt í takt við suðræna, hressa og skemmtilega tónlist. Sporin eru einföld og þess vegna geta ALLIR verið með og það er ALDREI of seint að byrja en ég kynntist þessu hjá Evu Reykjalín á Akureyri. Síðar fór ég í tíma hjá Jóa og Theu í Valsheimilinu í Reykjavík og eftir það ákvað ég að ég skyldi verða zumbakennari.

Ég tók réttindin hjá hollenskum kennara sem kom hingað til lands í fyrra vor og startaði ég svo mínu fyrsta námskeiði  í október í fyrra. Til að gera langa sögu stutta þá var bara ekkert aftur snúið, ég hafði fundið hreyfingu sem ég hreinlega elska". Segir Jóhanna Svava sem vill koma á framfæri þökkum til þeirra frábæru kvenna sem komu og dönsuðu með henni á laugardaginn. 

Jóhanna Svava er með zumbatíma í litla sal Íþróttahallarinnar á þriðjudögum og fimmtudögum kl.18:10.

Bleikt Zumbapartý í Íþróttahöllinni.

Edda Björg Sverrisdóttir gjaldkeri Krabbameinsfélags Suður-Þingeyinga tók við styrknum úr hendi Jóhönnu Svövu í dag.