Búrhval rak á land á Melrakkasléttu

Búrhvalshræið í fjörunni við Blikalón. Lj. VH

Í fjöruborðinu í landi Blikalóns á Melrakkasléttu strandaði á dögunum 15 metra langur karlkyns búrhvalur. 

Að sögn Valdimas Halldórssonar hjá Hvalsasafninu á Húsavík var hvalurinn heillegur og greinilega nýlega strandaður þegar hans varð vart.

Valdimar og Garðar Þröstur Einarsson starfsmaður safnsins fóru í gær og skoðuðu skepnuna ásamt Jóni Tryggva Árnasyni útvegsbónda frá Blikalóni.

Tekið var sýni fyrir Hafrannsóknarstofnun og lagt á ráðin hvað best væri að gera við hvalrekann. Vegna stærðar hvalsins og aðstæðna á staðnum verða einungis partar af skepnunni nýttir.

Á Hvalasafninu er til búrhvalsgrind sem er til sýnis en þann hval rak á land í Steingrímsfirði árið 1998.

Jón Tryggvi Árnason tekur sýni úr búrhvalshræinu fyrir Hafrannsóknar-stofnun.

Jón Tryggvi Árnason, Garðar Þröstur Einarsson, Valdimar Halldórsson og ónefndur hundur við búrhvalshræið.

Ljósmyndir Hvalasafn.is