Bumban á'ðér sigraði Kjarnafæðisdeildina

Skemmst er að segja frá því að mótinu lauk í gærkvöldi með úrslitaleikjum um sæti en Bumban á’ðér og lið Æskunnar frá Akureyri mættust í úrslitaleik um 1.sætið. Bumbumenn höfðu tögl og haldir framan af leik og fyrirliði liðsins, Davíð Þórólfsson, kom liðinu í 1-0 í fyrri hálfleik með marki úr vítaspyrnu. Í seinni hálfleik bættu Kristján Gunnar Óskarsson, Rafnar Orri Gunnarsson og Sigþór Hannesson við mörkum og lokatölur því 4-0.

 

Bumban á’ðér eru þar með ríkjandi meistarar Kjarnafæðisdeildarinnar á Akureyri en leið þeirra að titlinum var átta leikir sem unnust allir og endaði liðið með markatöluna 36-9 í þeim leikjum.

Rauða Eldingin, sem sigraði deildina í fyrra, spilaði gegn FC Neptúnus um 7.sætið og þurfti að bíta í hið súra epli. Töpuðu leiknum 5-3 en Benedikt Þór Jóhannsson gerði tvö mörk og Hrannar Rafn Jónasson eitt.

Titillinn helst þó á Húsavík og óskum við liði Bumbunnar á’ðér innilega til hamingju með deildarmeistaratitilinn