Blakfréttir Völsungs-Ungir sem aldnir á ferðinni

Blakkrakkar úr Völsungi. Lj. volsungur.is

Um síðustu helgi fóru blakkrakkar úr 4. og 5. flokki Völsungs í keppnisferð til Seyðisfjarðar og tóku þátt í svokölluðu Norður/Austurmóti.

Þar leiddu saman saman hesta sína lið af Austur- og Norðurlandi sér til skemmtunar og þótti mótið takast vel í alla staði.  

Á heimasíðu Völsungs segir að Huginsmenn og konur eigi heiður skilið fyrir gott mót sem þau þurftu að skella á með stuttum fyrirvara þar sem Þróttur Nes. féll frá keppnishaldi á síðustu stundu.

Alls fórum við með 5 lið til keppni og stóðu krakkarnir sig mjög vel og náðu m.a til verðlauna í 5. flokki á 4. stigi. Nokkur keppnis-skrekkur var í liðunum til að byrja með og ljóst er að gera má betur í því að að hitta önnur lið til að spila og fá reynslu inn á blakvelli með dómgæslu og stigagjöf.

Keppnisferðin var lokaverkefnið hjá krökkunum í vetur en æfingar halda áfram út aprílmánuð. 

Þá styttist í Íslandsmót öldunga í blaki en það fer fram í Garðabæ dagana 5-7 maí nk. en öldungamót í blaki var haldið í fyrsta sinni í Reykjavík árið 1976 og er nú haldið í 41.skipti.

Mótið hefur alla jafna verið haldið í kringum Sumardaginn fyrsta eða 1.maí en einstaka sinnum kringum Uppstigningardag eins og í ár.

Að þessu sinni eru átta lið frá Völsungi skráð til þátttöku, sex lið í kvennadeildum og tvö karlalið. Keppendur frá Völsungi telja um 53 manns sem hafa æft reglulega í vetur undir stjórn Ágústu Tryggva, Jóhönnu Guðjóns, Valgeirs Guðmunds og Bjarna Páls Vilhjálms. 

Í Garðabæ verður keppt í þremur íþróttahúsum en mótið er í umsjón blakdeildar Stjörnunnar. Undirbúningur er á lokastigi, um 160 lið eru skráð til leiks og ætla má að leikjafjöldi verði hátt í 500. 

Nánar verður hægt að fylgjast með framvindu mótsins á blak.is