Björgunarsveitinni Garðari þökkuð aðstoðin í óveðrinu

Kísilverið á Bakka sl. laugardag. Lj. Þorgeir Bald

"Veðurofsinn sem gekk yfir landið í síðustu viku lét okkur heldur betur vita af sér.

Atburðarásin hjá okkur hófst á þriðjudagskvöldinu þegar ísing kom á Þeistareykjalínu 1 og misstum við því afl á báðum ofnum hjá okkur.

Það tekur tíma að ná stöðugri framleiðslu aftur og því hafði það mikil áhrif á okkur síðastliðinn laugardag þegar bilun kom upp í spennivirki Landsnets eins og við greindum frá þann 14 desember.

Þessi vika hefur svo farið í að ná fyrri styrk ofnanna og eru þeir báðir á réttri leið". Segir á fésbókarsíðu PCC BakkaSilicon í dag.

Þar segir jafnframt: "PCC BakkiSilicon er framleiðslufyrirtæki sem er í gangi allan sólarhringinn allt árið um kring og því er afar mikilvægt fyrir okkur að starfsfólk okkar komist í og úr vinnu á öruggan hátt.

Þá er mikilvægt að eiga góða samstarfsaðila í héraði en Björgunarsveitin Garðar reyndist okkar afar vel þegar veðrið var sem verst og aðstoðaði okkar starfsfólk við að komast í og úr vinnu.

Það er óhætt að segja að þessi aðstoð hafi gert afar mikið fyrir okkur og mun PCC BakkiSilicon afhenda þeim styrk til tækjakaupa á næstunni. Takk kærlega fyrir okkur Björgunarsveitin Garðar".

Þessa mynd af kísilveri PCC á Bakka tók Þorgeir Baldursson sl. laugardag.