Bjarki og Jóna Björk íþróttafólk Völsungs 2016

Íþróttamenn Völsungs 2016.

Bjarki Baldvinsson knattspyrnumaður og Jóna Björk Gunnarsdóttir blakkona voru valin íþróttafólk Völsungs fyrir árið 2016 á samkomu sem Völsungur stóð fyrir í dag.

Bjarki er búinn að vera fyrirliði m.fl. karla síðast liðin ár og í lykilhlutverki sem leikstjórnandi.

Hann spilaði alla leiki liðsins nema einn á keppnistímabilinu 2016.

Bjarki er drífandi liðsmaður, leikinn og býr yfir afburða spyrnugetu. Hann á auðvelt með að stjórna spili og er afbragðs fyrirmynd fyrir yngri leikmenn félagsins. Bjarki er góður liðsfélagi og hefur jákvæð áhrif á liðsfélaga. Bjarki hefur samtals leikið 206 meistaraflokksleiki og þar af 161 leiki fyrir Völsung. 

Jóna Björk hefur verið lykilmanneskja í meistaraflokksliði Völsungs sem leikur í úrvals-deildinni í blaki tímabilið 2016-2017. Jóna Björk er frábær fyrirmynd fyrir yngri leikmenn, hún leggur hart að sér við æfingar og keppni og skilar ávallt sínu fyrir liðið.

Alls bárust 6 tilnefningar frá fjórum deildum en íþróttafólk Völsungs er valið úr hópi 16 ára og eldri. Þau sem vor tilnefnd auk Bjarka og Jónu Bjarkar voru Bocciafólkið Ólafur Karlsson og Sylgja Rún Helgadóttir, knattspyrnukonan Dagbjört Ingvarsdóttir og handknattleiksmaðurinn Sigurður Már Vilhjálmsson.

Bjarki Baldvinsson, Jóna Björk Gunnarsdóttir, Sylgja Rún Helgadóttir, Sigurður Már Vilhjálmsson, Ólafur Karlsson og Dagbjört Ingvarsdóttir.

Athöfnin fór fram að viðstöddu fjölmenni í Skjálfandasalnum á Fosshótel Húsavík og verður henni gerð betri skil á 640.is síðar.