Aukasýningar á Annie í sal Borgarhólsskóla

Nemendur sjöunda bekkjar í lokaatriði Annie

Á skólasamkomu Borgarhóls-skóla í síðustu viku var stærsta atriðið venju samkvæmt leikrit sjöunda bekkjar.

Nemendur settu upp útgáfu af söngleiknum Annie. Hún er ung stúlka sem býr á fósturheimili ásamt öðrum munaðarlausum krökkum og dreymir um að einn góðan veðurdag muni foreldrar hennar koma og sækja hana, enda hefur hún ástæðu til að ætla að svo verði. 

Leikstjórn var í höndum Ástu Magnúsdóttur og Karenar Erludóttur. Verkgreinakennarar höfðu veg og vanda að búningum og leikmynd. Nemendur hafa verið að æfa verkið undanfarnar vikur með aðstoð frá kennurum og foreldrum. Nemendur sáu sjálfir um ljós og hljóð með aðstoð.

Hver og einn, í hvaða atriði sem er sigrar sjálfan sig með því að koma, syngja, dansa og leika. Þess vegna er mikilvægt að halda í þessa hefð segir í frétt á heimasíðu Borgarhólsskóla en þar má sjá fleiri myndir frá skólasamkomunni.

Viðtökur voru mjög góðar og var fullt úr úr dyrum á samkomunni. Þess vegna hefur verið ákveðið að bjóða upp á tvær aukasýningar í dag, mánudag og á morgun, þriðjudag og hefjast þær kl 18:00.