Atvinnu- og nýsköpunarhelgi hefst á Akureyri í dag

Í dag kl. 18.00 hefst Atvinnu- og nýsköpunarhelgin á Akureyri og er þetta í fimmta skipti sem hún er haldin.

Í tilkynningu segir að helgin sé að venju vel sótt og hafa skráningar gengið vel. Þökk sé góðum styrktaraðilum þá verða veitt glæsileg verðlaun í lok helgarinnar til bestu hugmyndanna, 1.000.000,- króna til sigurvegarans, auk ráðgjafatíma frá KPMG.

Helgin er þó ekki einungis fyrir þá sem eru með góðar hugmyndir heldur ekkert síður fyrir þá sem hafa áhuga á nýsköpun og atvinnulífi og vilja leggja sitt að mörkum til að gera góðar hugmyndir að veruleika.

Þá má nefna fjölmarga fyrirlestra sem verða haldnir á helginni, einkum á morgun laugardag þar sem reyndir frumkvöðlar deila reynslu sinni, auk þess sem Kristján Freyr Kristjánsson stjórnandi helgarinnar og framkvæmdastjóri íslenskra viðskipta hjá Meniga verður með sérstaklega áhugaverðan fyrirlestur kl. 11.45 á morgun laugardag um gagnleg tól og tæki fyrir frumkvöðla.  

Helgin er sum sé opin öllum án endurgjalds en dagskrá helgarinnar má finna inn á www.ana.is.