Átta kílómetra gat í Dettifossvegi

Samkvæmt nýlegum upplýsingum Vegagerðarinnar er útboði lokið á 13,8 km kafla frá Dettifossvegi vestri norður fyrir Súlnalæk og eru verklok við þann kafla áætluð 1. september 2018. Þetta eru jákvæð tíðindi.

Við uppbyggingu Dettifossvegarins stendur þá eftir 8,0 km langur kafli frá Súlnalæk og norður fyrir Vesturdal. Þessi kafli Dettifossvegarins er gamall og niðurgrafinn moldarvegur og einungis opinn yfir sumartímann. Á sama tíma eru nýjir uppbyggðir og malbikaðir vegkaflar bæði sunnan og norðan við moldarveginn. Samkvæmt núverandi fjárlagafrumvarpi liggur ekki fyrir fjármögnun til að klára þennan vegkafla. Alger óvissa er því um hvenær hægt verður að nota Dettifossveginn sem heilsársveg.

Fyrir tvennar síðustu kosningarnar var mikið rætt um nauðsyn þess að setja meira fjármagn í uppbyggingu innviða. Fyrir ferðaþjónustu á Íslandi er viðhald og uppbygging vegakerfisins og annarra samgöngumannvirkja einn mikilvægasti þátturinn til þess að atvinnugreinin nái að vaxa og dafna öllum landsmönnum til heilla.

Ef sú staða kæmi upp að ríkisvaldið myndi í raun og veru skilja eftir þetta 8 km langa gat í Dettifossvegi væri það áfall fyrir ferðaþjónustuaðila á Norðausturhorninu. Þar fyrir utan væri það undarleg ráðstöðvun að klára ekki verkið fyrst það er þó komið þetta langt. Dettifossvegur liggur að aflmesta fossi Evrópu sem er eitt stærsta aðdráttarafl fyrir ferðamenn á Norðurlandi. Óviðunandi ástand þessa vegkafla sem nú er óvissa um er ekki einungis hamlandi á núverandi umferð, heldur dregur einnig verulega úr möguleikum ferðaþjónustunnar að vaxa sem skildi á þessu svæði, ekki síst á Norðurhjarasvæðinu.

Húsavíkurstofa og Norðurhjari eru vettvangur ferðaþjónustufyrirtækja á Húsavík og á svæðinu frá Kelduhverfi til Bakkafjarðar.

"Við skorum á Alþingi að sjá til þess að Dettifossvegurinn verði kláraður í síðasta lagi árið 2019 öllum íbúum landsins til hagsbóta". Segir í áskorun Húsavíkurstofu og Norðurhjara.