Arnheiður ráðin í starf verkfnastjóra í Gíg

Arnheiður Rán Almarsdóttir.

Arnheiður Rán Almarsdóttir hefur verið ráðin í starf verkefnastjóra á sviði umhverfis- og atvinnuþróunar með starfsstöð í Gíg í Þingeyjarsveit.

Frá þessu segir á heimasíðu SSNE en verkefnið er samstarf SSNE og Þingeyjarsveitar og er ráðið tímabundið til tveggja ára. Arnheiður var valin úr hópi 10 umsækjenda og verður hlutverk hennar að vinna að verkefnum á sviði umhverfis- og orkumála, verkefnum tengdum fjölnýtingu jarðvarma og atvinnuuppbyggingu í Þingeyjarsveit svo fátt eitt sé nefnt.

Arnheiður er með BSc, gráðu í líftækni og MSc. gráðu í auðlindafræði. Auk þess er hún með MEd. gráðu í kennslufræðum ásamt því að hafa sinnt ýmsum nefndarstörfum á umhverfissviði.

Arnheiður hefur starfað í mörg ár við umhverfismál og auðlindanýtingu en núna síðast vann hún sem kennari í Mývatnssveit þar sem hún meðal annars vann að innleiðingu Grænafána verkefnisins og stýrði tilraunverkefni í úrgangsmálum. Hún starfaði áður sem framkvæmdastjóri MýSköpunar ehf., og kom þar á legg þörungaræktun með jarðvarmanýtingu og verðmætasköpun að leiðarljósi.