Anna Sigrún, Hafliði og Rúnar sæmd gullmerki Völsungs

Þrir einstaklingar voru sæmdir gullmerki Völsungs á samkomu félagsins í Miðhvammi síðdegis í dag.

Þetta eru Hafliði Jósteinsson, Anna Sigrún Mikaelsdóttir og Sveinn Rúnar Arason.

Þau hafa æft og starfað innan félagsins í meira en 25 ár og starfa enn að félagsmálum og eru virkir þátttakendur í samfélaginu.

Hafliði Jósteinsson, Anna Sigrún Mikaelsdóttir og Sveinn Rúnar Arason voru sæmd gullmerki Völsungs í dag.

Anna Sigrún Mikaelsdóttir.

Í máli Guðrúnar Kristinsdóttur formanns Völsungs kom fram að Anna Rúna hefur starfað á fjórða tug ára fyrir Völsung á Húsavík. Hún var formaður frjálsíþróttadeildar í 5 ár,1987-1992. Hún var kjörinn formaður HSÞ 1997 og starfaði sem formaður til ársins 2005. Þá hefur Anna Rúna starfað innan Golfklúbbs Húsavíkur í áratugi og tekið að sér formennsku þar. Nú er Anna formaður eldri borgara á Húsavík.

Í viðtali kom fram hjá Önnu Rúnu að þetta starf hafi gefið henni mikla ánægju og gleði í lífinu enda hafi hún eignast ótal marga vini og kunningja í gegnum þennan félagsskap sem heyrir til ungmenna og íþróttahreyfingunni um allt land. „Það er einstök tilfinning að koma á mót og fundi, vítt og breitt um landið og hitta fyrir öll þessi kunnuglegu andlit, sem ljóma af vinskap og ánægju," segir Anna. Aðspurð segist hún aldrei sjálf hafa keppt fyrir Völsung né HSÞ. „ Ég hef aldrei keppt í nokkurri íþróttagrein, en þá eins og nú, hef ég verið með sem stuðningsmaður, áhangandi vina og félaga. Alltaf tilbúin að vera með og horfa á, aðstoða á æfingum, hlaupa á eftir spjótinu og kúlunni o.s.frv. Það má því segja að ég sé í klappliðinu,".

Anna Rúna sagði eftir að hafa verið sæmd gullmerkinu að hún væri loks byrjuð að keppa fyrir Völsung en hún hefur tekið þátt í Bocciamótum fyrir Völsung.

Hafliði Jósteinsson.

Í máli Guðrúnar kom fram að Hafliði hafi stundað knattspyrnu með Völsung í áratugi og segir frá því í viðtali að hann hafi byrjað á eldhúsgólfinu 6 ára að leika sér í knattspyrnu. Hann var í sigurliði Íslandsmeistara Völsungs frá árinu 1967 og æfði knattspyrnu lengi fram efir aldri og var ætíð á miðjunni.

Hann hefur setið í stjórn knattspyrnudeildar í mörg ár og einnig þjálfaði hann yngri flokka í nokkur ár. Þá sat Hafliði í aðalstjórn félagsins um skeið sem meðstjórnandi og síðar sem varaformaður. Hafliði var ávallt reiðubúinn að sinna ýmsum félagstörfum innan félagsins þegar til hans var leitað. Honum verður seint fullþakkað fyrir öll þau skipti sem hann kom að þátttöku við jólatrésskemmtanir Völsungs.

Hafliði hefur alltaf verið ötull verkamaður í öllu tómstundastarfi í bæjarfélaginu. Hafliði er öflugur og dyggur stuðningsmaður Völsungs og það eru fáir leikir sem ekki heyrist í Hafliða í brekkunni þar sem hann hvetur okkar iðkendur og enn  mætir hann á leikina og fylgist vel með.

Sveinn Rúnar Arason.

Fram kom hjá Guðrúnu að Rúnar hafi stundaðiknattspyrnu sem aðalmarkmaður Völsungs í áratugi og varið það af stakri snilld. Hann var í fyrsta Íslandsmeistaraliði Völsungs frá árinu 1967.

Þá sat Rúnar í stjórn knattspyrnudeildar um nokkurt skeið. Rúnar var aðalknattspyrnudómari Völsunga í áratugi og það eru margir leikir sem hann hefur dæmt fyrir okkur, bæði í yngri flokkum og meistaraflokki. Rúnar hefur ætið verið góður og dyggur stuðningsmaður Völsungs og mætir enn á flesta leiki félagsins og hvetur okkur áfram. Þá átti félagið mikið og gott samstarf við Rúnar sem forstöðumaður Sundlaugar Húsavíkur í áratugi.

Rúnari er þakkað hans mikla framlag til félagsins í gegnum áratugina.

Með því að smella á myndirnar er hægt að fletta þeim og skoða í stærri upplausn.