Amma Helga nýr bátur í flota Gentle Giants

"Eikarbátarnir eru góðir og skila sínu verulega vel í þeirri vöru okkar sem þeir sinna.  Þessi vara sem ömmurnar sinna – hún er frábrugðin, tekur styttri tíma en veitir meiri upplifun. Mun meiri líkur á að finna hval sökum möguleika á meiri hraða og yfirferð.  Hreyfingar í bátunum eru algerlega ólíkar og sjóveiki hverfandi þáttur. Þá eru þessir RIB bátar sömuleiðis margfalt öruggari en gömlu trébátarnir í flestum skilningi. 

Þeir eru splunkunýir, útbúnir tveimur aðalvélum, tvö aðskilin eldsneytiskerfi, tvöfalt öryggi, skrokkur / blöðrur, góð sæti fyrir hvern og einn farþega, allir farþegar í flotgöllum og með björgunarvesti. Það er ástæða fyrir því að þessir RIB bátar hafa verið valdir sem helstu sjóbjörgunartækin á heimsvísu, til strandgæslustarfa í hernað os.frv.  Okkar bátar hér hafa sannað sitt björgunargildi á staðnum rækilega og oftar en einu sinni, og það hafa bátar Vestmannaeyinganna gert sömuleiðis.

Plastbáturinn okkar Aþena er traustur og góður bátur sem við notum fyrst í grásleppu á vorin og svo mest í sjóstangaveiðiferðir á sumrin, ásamt allskonar verkefnum öðrum, hvalaskoðun, vinnuferðir hingað og þangað og hentug fyrir minni hópa sem vilja oft á tíðum bæði veiða og skoða".

Hvernig hefur vertíðin farið af stað þetta sumarið og hvernig lítur framhaldið út ?

"Vertíðin hefur farið ákaflega vel af stað hjá okkur, mikið af hval og útlitið gott. Mestu er þar auðvitað um að þakka þessum langa einmuna góða veðurkafla sem að baki er, einstökum og samstilltum hópi starfsmanna sem vinna allir að sama markmiði á sömu blaðsíðu; ásamt öflugu kynningar og sölustarfi sem við höfum eflt ár frá ári, skref fyrir skref.  

Við erum rétt að byrja, þótt við fögnum 15 ára starfsafmæli fyrirtækisins á þessu ári. Þennan frasa hef ég reyndar notað frá upphafi og finnst ég í raun hafa byrjað í hitteðfyrra. Á fyrsta ári vorum við með einn bát og tvo starfsmenn; í ár sýnist mér við vera nálægt 40 manns á launaskrá og átta bátar sem sinna fjölbreyttum verkefnum okkar; ótrúlega skemmtilegur tími liðinn í uppbyggingunni hjá GG og lygilega fljótur að líða". Segir Stefán að lokum og bætir við að það vanti stundum fleiri klukkustundir í sólarhringinn, það viðurkenni hann fúslega.

Meðfylgjandi myndir, nema þá neðstu, tók Gaukur Hjartarson við komu Ömmu Helgu til heimahafnar og með því að smella á þær er hægt að fletta þeim og skoða í stærri upplausn.

Hluti flota GG við flotbryggju fyrirtækisins.

Amma Helga við bryggju en hún er nefnd eftir Helgu Jónínu Stefánsdóttur móður Stefáns eiganda GG.

Karl Óskar Geirsson útgerðarstjóri GG bindur landfestar Ömmu Helgu við heimkomuna.

Stefán Guðmundsson framkvæmda- og skipstjóri hjá GG með blómvönd sem fyrirtækinu var fært við komuna.

Amma Helga.

Stefán ásamt foreldrum sínum og eiginkonu, fv. Guðmundur A. Hólmgeirsson, Helga J. Stefánsdóttir, Stefán Guðmundsson og Jóhanna S. Svavarsdóttir.