Leggjast gegn sameiningu heilbrigðisstofnana

Til stendur að sameina heilbrigðisstofnanir á Norðurlandi í eina stofnun á haustdögum. Hinn faglegi ávinningur felst fyrst og fremst í auknum stöðugleika í þjónustunni og auknum tækifærum til þróunar segir í skýrslu frá ráðuneyti heilbrigðismála.

Jafnframt segir að „litlar og stakstæðar heilbrigðisstofnanir standa veikar á þessum tímum“. Heilbrigðisyfirvöld og ráðherra  telja af þessum sökum brýnt að endurskipuleggja heilbrigðisþjónustu á landsbyggðinni til þess að tryggja þá grunnþjónustu sem íbúarnir þurfa.

Nýlega hlaut Heilbrigðisstofnun Þingeyinga sæmdarheitið Fyrirmyndarstofnun árið 2014 á vegum SFR. Stofnunin er vel rekin og skilaði hagnaði á síðasta ári. Ekki hefur verið sýnt fram á fjárhagslegan ávinning með þessari sameiningu enda ekki markmiðið með sameiningunni.

„Meginávinningur sameiningar er talinn verða styrkari stjórn og aukið sjálfstæði stofnana, hagkvæmni og betri, öruggari og sveigjanlegri þjónusta við íbúana, ekki síst á jaðarbyggðum“. Hvernig má það vera að með því að draga úr mætti og gæðum Heilbrigðisstofnunar Þingeyinga aukist sjálfstæði hennar, stjórn verði styrkari og þjónustan við íbúana hagkvæmari og betri, öruggari og sveigjanlegri. Þessi rök standast enga skoðun enda hefur enginn sýnt fram á hagræðinguna né fullvissað íbúa í Þingeyjarsýslum að þjónustan við þá verði betri og öruggari.

Framsóknarfélag Þingeyinga krefst þess af heilbrigðisráðherra og heilbrigðisyfirvöldum að falla frá fyrirhugaðri sameiningu. Annað er og verður með öllu óásættanlegt

Húsavík, 25. maí 2014