Aldar afmælissýning HSÞ

Landsmótsvíkingurinn 1987

Í gær opnaði aldar afmælissýning Héraðssambands Þingeyinga (HSÞ), en héraðssambandið var stofnað 31. október 1914. HSÞ er sameinað félag Ungmennasambands Norður Þingeyinga og Héraðssambands Suður Þingeyinga. Á sýningunni er mikið af munum og myndum frá þessum félögum. Ólympíuförum Þingeyinga eru gerð sérstök skil, landsmótum sem haldin hafa verið í héraði, glímu, hátíðasamkomum beggja aðila og fleira.

Fjöldi manns kom á þessum fyrsta degi sýningarinnar og þáðu veitingar í boði HSÞ.

Frír aðgangur er á sýninguna og hvetjum við alla Þingeyinga sem og aðra gesti Þingeyjarsýslu til að kíkja við í Safnahúsinu á Húsavík og sjá þessa merkilegu sýningu sem verður opin alla daga frá kl.10-18 til og með 15. júlí.