Afturelding áfram í Kjörísbikarnum - MyndasyrpaÍþróttir - - Lestrar 119
Afturelding sigraði Völsung 3-0 í dag í átta liða úrslitum í Kjörísbikar kvenna í blaki.
Leikurinn fór fram í íþróttahöllinni á Húsavík og fyrifram búist við öruggum sigri Aftureldingar sem eru í 2. sæti úrvalsdeildar en Völsungar í næst neðsta sæti.
Það virtist ætla að ganga eftir þar sem Afturelding byrjaði að krafti og sigraði fyrstu hrinuna örugglega 15-25.
Eitthvað náðu Völsungar að hrista af sér stressið í annari hrinu og náðu aðeins að klóra í bakkann þrátt fyrir að sigur Aftureldingar væri aldrei í hættu en gestirnir sigruðu 19-25.
Í þriðju hrinu mættu Völsungsstúlkur heldur betur ákveðnar til leiks og buðu upp á hörku blak vel studdar af stuðningsmönnum á pöllunum.
Hrinan var hnífjöfn allan tímann þar sem liðin skiptust á leiða og endaði svo í upphækkun. Þar knúði Afturelding fram sigur 26-28 eftir nokkur dýr mistök í liði Völsungar sem skrifast má á reynsluleysi og ungan aldur leikmanna, en klárlega fer þetta í reynslubankann.
Stigahæst í liði Völsungs var Tamara Kaposi með þrettán stig en í liði Aftureldingar voru Tinna Rut og María Rún með níu stig hvor.
Meðfylgjandi myndir tók ljósmyndari 640.is á leiknum og með því að smella á þær er hægt að fletta þeim og skoða í hærri upplausn.
Tami fékk blóm frá blakdeildinni eftir leik en hún var fyrr í dag valin Íþróttamaður HSÞ.