Aðventurtónleikar í Húsavíkurkirkju í gærkveldi

Aðventutónleikar í Húsavíkurkirkju.

Kirkjukór Húsavíkur hélt sína árlegu aðventutónleika í Húsavíkurkirkju í gærkveldi og voru þeir vel sóttir að venju.

Aðventurtónleikarnir, sem jafnan kalla fram jólaandann, voru hátíðlegir og notalegir í senn.

Judit Györgi stjórnaði kórnum að nýju eftir árs leyfi og um undirleik sá Jan Alavere. Með kórnum sungu einsöng Aðalsteinn Júlíusson, Kristján Þ. Halldórsson og kórfélagarnir Baldur Baldvinsson og Hjálmar Bogi Hafliðason.

Kórfélagarnir Daníel Borgþórsson, Gunnar Hrafn Gunnarsson og Unnsteinn Júlíusson skipuðu hljómsveit sem lék undir í nokrum lögum og þá lék Lea Hrund Hafþórsdóttir á þverflautu í laginu Vetrarnótt sem Aðalsteinn söng.

Einnig  kom fram Bjöllukór skipaður fjóru ungum nemendum Juditar við Tónlistarskóla Húsavíkur og lék eitt lag auk þess að leika undir í einu lagi með kórnum. Kórinn skipuðu Hugrún Ósk Birgisdóttir, Herdís Mist Kristinsdóttir, Björg Gunnlaugsdóttir og Hreinn Kári Ólafsson.

Tónleikunum lauk að venju með því að kirkjugestir sungu Heims um ból með kirkjukórnum.

Hér koma nokkrar myndir frá tónleikunum og með því að smella á þær er hægt að fletta þeim og skoða í stærri upplausn.