120 keppendur á Krakkablakmóti

Í vetur hafa ríflega 30 krakkar æft krakkablak í yngri og eldri flokki hjá Völsungi. Í september tóku stelpurnar í 4. flokki þátt í Íslandsmóti ,en næsta mót fyrir flokkana er ekki fyrr en um miðjan maí. Því kom sú hugmynd upp í haust að halda eitt mót á miðjum vetri fyrir iðkendur á norður- og austurlandi og buðust við til þess að sjá um það mót.
Þátttakendur um helgina komu, auk Völsunga frá Þrótti á Neskaupsstað, KA Akureyri, Hugin á Seyðisfirði og Einherja á Vopnafirði , alls um 120 keppendur. Keppt var í 4. og 5 .flokki í mismunandi stigum, eða eftir aldri og getu iðkenda. Mismunandi blakreglur gilda milli stiga en aðeins eru 4 leikmenn inni á vellinum í einu.

Vegna slæmrar veðurspár voru gestirnir okkar komnir til Húsavíkur um miðjan dag á föstudag. Mörg þeirra nýttu tímann og fóru í göngutúr um bæinn eða í sund en Norðurþing bauð öllum þátttakendum í Sundlaugina.  

Keppni hófst á laugardagsmorgun og  var spilað vel fram eftir degi, á fjórum völlum í senn, alls 56 leikir. Á sunnudeginum var spilað fram undir hádegi eða alls 24 leikir.
Krakkarnir gistu í Borgarhólsskóla og þar var einnig boðið upp á mat í flotta matsal skólans.
Mikil ánægja var með matinn sem boðið var upp á, fjölbreytileika og gæði.
Stelpurnar í eldri flokki Völsungs sáu um kvöldvöku og diskó á laugardagskvöldinu sem fór mjög vel fram og vakti mikla lukku og eiga þær hrós skilið við framtakið.
Gestirnir okkar voru mjög ánægð með helgina, krakkarnir höfðu gaman að því að heimsækja nýjan bæ og kynnast nýjum krökkum, bæði innan vallar sem utan.

Foreldrar Völsungsbarna sáu um gæslu í skólanum allan sólarhringinn, stóðu vaktir í eldhúsinu, sinntu dómgæslu á keppnisvöllum og í lokin sáu um þrif á því húsnæði sem við höfðum til afnota.
Þau eiga miklar þakkir skildar fyrir sitt vinnuframlag,  því án þeirra hjálpar gætum við ekki staðið fyrir svona móti.  
Ekki má gleyma öllum krökkunum sem tóku þátt, leikgleðin var í fyrirrúmi og þau sýndu miklar framfarir með hverjum leik.
Sérstakar þakkir eru veittar eftirtöldum aðilum fyrir ómetanlegan stuðning og þeirra framlag við Krakkamót Blakdeildar Völsungs;
Borgarhólsskóli
Norðurþing – Sundlaug Húsavíkur
Norðlenska
Samkaup – Kaskó Húsavík

Næsta mót fyrir hópinn er Íslandsmót í 4. og 5. flokki sem haldið verður 9. – 10. maí í Kórnum í Kópavogi og stefnum við á þátttöku þar.

Með góðri kveðju

Fh. Blakdeildar
Dagbjört Erla, Erla Bjarna, Jóna Matt og Lúðvík.