1. febrúar er Dagur kvenfélagskonunnar

Kvenfélagskonur á landsþingi.

1. febrúar er Dagur kvenfélags-konunnar. Dagurinn, sem er stofndagur Kvenfélagasambands Íslands, (1930) var formlega gerður að degi kvenfélagskonunnar árið 2010.

Var það gert til að vekja athygli á miklu og óeigingjörnu starfi kvenfélagskvenna í 140 ár.

Það var enda löngu tímabært að kvenfélagskonur fengju sinn eigin dag á dagatalinu.

Dagurinn hefur fest sig í sessi undanfarin ár og er hans nú getið á fjölmörgum dagatölum og í dagbókum. Kvenfélagasamband Íslands í samstarfi við RÚV og sveitarfélögin í landinu minnir á og vekur athygli á deginum í fjölmiðlum.

Á fésbókarsíðu Kvenfélagasambands Íslands eru kvenfélög og kvenfélagskonur hvattar til að muna eftir deginum og jafnvel gera sér dagamun hver og ein eða saman, en einnig að vera tilbúnar til að taka á móti hamingjuóskum og athygli þennan dag.

Ekki er ætlast til þess af kvenfélagskonum að þær standi sjálfar að hátíðahöldum þennan hátíðisdag. Mörg kvenfélög minnast dagsins þó með ýmsum hætti og er það auglýst innan kvenfélaganna og héraðssambanda þeirra.