Ofnbaka lambalri me TequilassuStra & sntt slunni - Hafr Hreiarsson - Lestrar 838 - Athugasemdir (0)
Forréttinn þarf að undirbúa með smáfyrirvara, en er þó mjög einfaldur.
Kaldur rækjukokteill í rauðri sósu (Ceviche Rojo de Camarón y Sierra)
250 gr. Rækjur
250 gr. Ýsuflök skorin í smábita
125 ml. Nýkreistur sítrónusafi
75 gr. Smátt saxaður laukur
2 tsk. Smátt saxaður hvítlaukur
¼ Bolli saxað ferskt koríander
1 stk. Lárpera (haas avocado) brytjuð í teninga
1 dós. Kurlaður ananas (safanum hellt af og hann ekki notaður)
2 tsk. Sjávarsalt
½ tsk. Nýmulinn svartur pipar
250 ml. Tómatsósa (ég myndi ekki nota Vals)
1 msk. “salsa picante hot – sause” eða tabasco sósa (meira eða minna, bara eftir því hvað bragðlaukarnir eru að höndla)
Leggið ýsubitana í skál, hellið sítrónudjús yfir og látið bíða á eldhúsbekknum í allt að tvær klst. Bætið við, rækjum, lauk, hvítlauk, salt og pipar - og hrærið öllu saman. Sett í ísskáp og kælt í amk. hálftíma. Hellið safanum af og bætið að lokum við, koríander og ananas. Ég set þetta alltaf í kokteil glös og skreyti með lárperubitunum. Með ristuðum tortilla kökum má alveg kalla þetta máltíð útaf fyrir sig.
Ofnbakað lambalæri með Tequila sósu (Pierna de Carnero Asada)
2 msk. Olífu olía
5 stk. Hvítlauksrif, fínt söxuð
2 tsk. Nýmulinn svartur pipar
1 tsk. Sjávarsalt
3 tsk. Timian krydd
250 ml. Tequila (og smá í snafsaglas til að sannfæra kokkinn um gæðin?)
2 – 2 ½ kg. Lambalæri
Sósa
1 stk. (uþb. 2 msk. ef kurlaður) Jalapeño úr dós – niðursoðinn í olíu.
1 tsk. Epla edik
750 ml. Kjúklingasoð ( 3. teningar fyrir 750 ml.)
2 msk. Olífu olía
3 stk. Hvítlauksrif
2 msk. Hveiti
Saltist eftir smekk.
Setjið olíu í pönnu og hitið við meðalhita, bætið fínt söxuðum hvítlauk við og brúnið þar til hann gyllist, ca 3-4 mínútur (að sama tíma brúnið hvítlauksrifin þrjú, í flusinu, fyrir sósuna – setjið þau til hliðar þar
til síðar). Takið af hellunni, setjið út á salt, pipar og timian og hellið tequila út í og hrærið öllu vel saman.
Leggið lærið í eldfast form, hellið tequila blöndunni yfir og nuddið kryddinu vel í kjötið. Látið hvíla í vökvanum í 30-40 mínútur, snúið lærinu reglulega og nuddið kryddinu áfram á allar hliðar (farið að hljóma eins og blessað lærið sé í Nordica Spa).
Hellið tequila blöndunni í pönnu. Setjið undir lærið grind (enn í eldfasta forminu) og þá loks í 220°C heitan ofninn, svona rétt fyrir neðan miðju ofnsins. Lækkið hitastigið niður í 165 °C og bakið kjötið þar til kjötmælir sýnir 130 °C. (1 ½ - 2 klst). Sjóðið nú tequilablönduna og ausið reglulega yfir kjötið meðan það bakast.
Nú að sósunni; sjóðið fyrst saman vatnið og kjúklingateningana í potti. Ausið frá í einn bolla og hellið í blandara ásamt jalapeño og ediki og maukið vel. Bætið maukinu svo aftur saman við afganginn af soðinu í pottinum. Á pönnu hitið olíu, flysjið hvítlauksrifin þrjú áður steiktu, maukið þau og setjið í olíuna. Bætið hveitinu út í og hrærið þar til blandan er ljósgul. Að lokum bætið jalapeño maukinu út í ásamt kjúklingasoðinu og hrærið stöðugt í þar til sósan er “slétt og mjúk”.
Berið fram með hvítum hrísgrjónum og fersku salati.
(Mexíkósk eldamennska er oftast kröfuhörð á potta, pönnur og ílát. Og lyktin gjarnan virkilega sterk, sem kannski útskýrir af hverju allir elda úti undir berum himni í suðrinu - en ég vona að þetta reynist réttir er þið munið njóta eins vel og ég geri)
Ég sendi hér með uppskriftaráskorunina til Ingu Bjarkar Hafliðadóttur í Þýskalandi, hún þykist vera heldur óvirk í sínu eldhúsi – en oftast þegar ég spjalla við hana þá er hún að leggja á borð veislumat! Ég er spennt að sjá hvað hún leggur til, kannski við fáum tyrkneskt lamb næst...
Kveðja Stella Solis