Velferðarmál – hvað er það?

Heiðbjört Ólafs og Jóhanna Kristjáns.

Samkvæmt BSRB tryggir öflugt velferðarkerfi samfélaginu jöfnuð og sanngirni. Eitt af meginhlutverkum hins opinbera er að halda uppi öflugu velferðarkerfi þar sem landsmönnum óháð búsetu er tryggð örugg framfærsla, heilbrigðis- og félagsþjónusta, menntun og réttarvarsla. Velferðarkerfi þarf að tryggja öllum aðgang að framúrskarandi þjónustu án tillits til greiðslugetu. Þetta velferðarkerfi á að fjármagna úr sameiginlegum sjóðum landsmanna. 

Og hvað þýða velferðarmál þá fyrir Norðurþing?

Við erum með góða heilbrigðisþjónustu og vel menntað starfsfólk. Ljóst er að húsnæðismál þarf að tryggja bæði í félagsþjónustunni og fyrir eldri íbúa Norðurþings. Í fjármálaáætlun ríkisstjórnarinnar til ársins 2023 er gert ráð fyrir 23ja rýma nýju hjúkrunarheimili á Húsavík. Reyndar er ekki verið að fjölga hjúkrunarrýmum, heldur er þetta liður í því að endurbæta aðstöðuna fyrir íbúa hjúkrunarheimila. Þessu þarf að fylgja fast eftir svo áætlunin verði að veruleika. Ennfremur þarf að tryggja að uppbygging á Pálsgarðsreitnum gangi eftir, bæði er viðkemur íbúðir fyrir eldri íbúa, sem og stækkun við íbúðarkjarna félagsþjónustunnar. Auka þarf framboð á búsetaréttaríbúðum og kanna leiðir til fjölbreyttari leiða í búsetukosti á vegum sveitarfélagsins. Mikilvægt er að fólk með fötlun hafi tækifæri til að lifa farsælu lífi, m.a. með því að búa sjálfstætt. Því þarf að hefja uppbyggingu nýs íbúðakjarna með sértækri þjónustu fyrir fólk með fötlun.  

Í velferðarsamfélagi þurfa íbúar Norðurþings að upplifa öryggi, vellíðan og tryggja þarf þátttöku þeirra. Okkur sem mæðrum og okkur sem íbúum þessa samfélags finnst mikilvægt að komið verði á laggirnar fagteymi á vegum sveitarfélagsins sem hefur það hlutverk að fjölga leiðum til aukinnar velferðar og betri líðan meðal barna og ungmenna í samfélaginu okkar. Jafnframt þarf að efla  samskiptin við HSN, sérstaklega í málefnum ýta undir að okkar samfélag verði Heilsueflandi samfélag, því Sjálfstæðisflokkurinn leggur mikla áherslu á að geðræktarmál verði sérstakt áherslumál á næsta kjörtímabili. Rjúfa þarf félagslega einangrun þar sem hún þrífst, virkja þarf íbúana og stuðla að þátttöku þeirra, sem ef vel tekst til leiðir af sér betri andlegri-, félagslegri- og líkamlegri líðan. Ávallt þarf að huga að hreyfingu fólks og sveitarfélagið getur gert sitt til að ýta undir hana. Til dæmis með því að bæta gangstíga og aðgengi að stofnunum Norðurþings þannig að allir komist ferða sinna óhindrað. 

Sjálfstæðisflokkurinn vill bjóða upp á heitan mat í hádegi fyrir eldri íbúa þar sem hugað er að fjölbreyttri og góðri næringu á kostnaðarverði. Góð og fjölbreytt næring er mikilvæg fyrir heilbrigði íbúanna, jafnframt er gott að eiga kost á því að sitja til borðs með samborgurum sínum, spjalla um daginn og veginn, sem er einn þáttturinn í að rjúfa félagaslega einangrun fólks. 

Það er ljóst að allir á framboðslista Sjálfstæðisflokksins tala máli aukinnar velferðar íbúa sveitarfélagins. Með þannig þenkjandi hóp fólks og þannig þenkjandi sveitarstjóraefni í forystu sætinu erum við reiðubúnar til að leggja okkar af mörkum til að velferðarmálum verði áfram vel sinnt og að í þessum málum geri sveitarfélagið enn betur í dag en gert var í gær. Því óskum við kjósendur góðir eftir stuðningi ykkar til að koma þessum málefnum áfram, en málaflokkurinn er okkur mjög hugleikinn og erum við tilbúnar til að leggja allt okkar í að vel megi fara í velferðarmálum Norðurþings. 

Heiðbjört Þ. Ólafsdóttir, 4. sæti Sjálfstæðisflokksins

Jóhanna S. Kristjánsdóttir, 8. sæti Sjálfstæðisflokksins