Tryggva Brands Jóhannssonar minnst á fundi sveitarstjórnar Norðurþings

Tryggvi Brandr Jóhannsson. Ljósmynd HH 2006.

Í upphafi fundar sveitarstjórnar Norðurþings sl. þriðjudag minntist Óli Halldórsson forseti sveitar-stjórnar Tryggva Brands Jóhannssonar sem lést þann 28 ágúst sl.

"Fallinn er frá Tryggvi Jóhannsson fyrrum starfsmaður Norðurþings og fulltrúi í sveitarstjórn.

Tryggvi var fæddur 10. apríl 1949 og var ráðinn til starfa á skrifstofu þáverandi Húsavíkurbæjar þann 1. nóvember 1974. 

Á starfsævinni tók Tryggvi að sér margvísleg ábyrgðarstörf á vettvangi sveitarfélagsins, bæði í hlutverki kjörins sveitarstjórnar-manns og einnig sem starfsmaður og yfirmaður í stjórnsýslu sveitarfélagsins.

Það var fyrir aldarfjórðungi sem Tryggvi var fyrst kjörinn í sveitarstjórn Húsavíkurbæjar og sat í kjölfarið í sveitarstjórn fram yfir sveitarstjórnarkosningar árið 2006. 

Á starfstíma Tryggva sem sveitarstjórnarmaður gengdi hann margvíslegum hlutverkum fyrir sveitarfélagið Norðurþing eins og setu í bæjarráði, setu og forystu í nefndum og stjórnum á vettvangi sveitarfélagsins og samstarfsaðila þess.

Tryggvi var kjörinn forseti bæjarstjórnar eftr kosningar 2002 en hann lét síðar af störfum sem kjörinn fulltrúi til að sinna starfi sviðsstjóra á framkvæmda- og þjónustusviði sveitarfélagsins. 

Tryggvi lét af störfum hjá Norðurþingi og fór á eftirlaun árið 2018. 

Trggvi Jóhannsson er meðal þeirra sem sem mikinn svip hefur sett á sveitarfélagið Norðurþing og forvera þess, Húsavíkurbæ og fyrir hönd sveitarstjórnar Norðurþings vil ég votta Tryggva virðingu með þakklæti fyrir öll þau störf sem hann hefur sinnt fyrir sveitarfélagið á liðnum árum. 

Fjölskyldu og aðstandendum Tryggva sendi ég dýpstu samúðarkveðjur" sagði Óli Hallórsson.

Sveitarstjórn Norðurþings reis úr sætum og minntist Tryggva Jóhannssonar.