Norðurþing fyrir okkur öll

Helena Eydís Ingólfsdóttir.

Frá árinu 2014 hefur íbúum í Norðurþingi fjölgað um 15% úr 2822 árið 2014 í 3234 þann 1. janúar á þessu ári 2018.

Fjölgun íbúa sem þessi er mikið fagnaðarefni á svæði sem glímt hefur við fækkun íbúa á undanförnum árum. Mikilvægt er að fjölgunin sé komin til að vera, þrátt fyrir að við gerum okkur grein fyrir þeim mikla fjölda tímabundinna starfa sem hér hefur verið vegna uppbyggingar á Bakka. Fjölgun íbúa í sveitarfélaginu fylgja óhjákvæmilega ýmsar áskoranir. Flestar koma þær fram í þéttbýlinu þar sem flest fólk velur sér búsetu. Margt af því fólki sem flust hefur til sveitarfélagsins er á barneignaraldri og hefur flutningur þess til Norðurþings því víðtæk áhrif í samfélaginu. Börnum á leik- og grunnskólaaldri fjölgar, meiri ásókn verður í íþrótta- og tómstundastarf, börnum fjölgar á frístundaheimili og svo framvegis. 

Á því kjörtímabili sem nú er að ljúka hefur þessum þörfum verið mætt. Brýn þörf um fleiri leikskólapláss var leyst með því að festa kaup á íbúðarhúsi við Iðavelli. Nýverið var gerður skammtímarekstrarsamningur við Völsung sem tekur mið af auknum umsvifum félagsstarfsins og framundan er að hefja samningagerð til lengri tíma. Þá var frístundaheimili barna í 1.-3. bekk fundinn nýr staður í íþróttahúsinu á Húsavík sem hefur gefist mjög vel og notendum fjölgað. 

Á undanförnum vikum hafa frambjóðendur Sjálfstæðisflokksins í komandi sveitarstjórnarkosningum komið saman nær daglega til að ræða stefnumál flokksins í komandi sveitarstjórnarkosningum. Þar hefur verið lögð rík áherslu á að aðbúnaður barna og unglinga verði í forgrunni. Á Húsavík er öflugur tónlistarskóli sem hefur sinnt sveitarfélaginu öllu. Hann þurfum við að efla enn frekar og hugsa þarf til framtíðar aðstöðu skólans ásamt því að hlúa betur að tónlistariðkun barna og ungmenna, sem má til að mynda gera með því að koma upp aðgengilegri æfingaaðstöðu fyrir hljómsveitir. Í sveitarfélaginu öllu eru íþróttamannvirki sem þarf að halda við og þá þarf að huga að frekari uppbyggingu íþróttamannvirkja til lengri tíma. Við viljum leggja í vinnu við framtíðar stefnumótun varðandi uppbyggingu íþróttamannvirkja ásamt því halda áfram þeim verkefnum sem hafin eru svo sem að veita byggingu nýs golfskála brautargengi og halda áfram uppbyggingu útivistarsvæðis við Reiðarárhnjúk. Við þurfum að huga að varanlegri lausn varðandi fjölgun leikskólaplássa. Þá erum við orðin Heilsueflandi samfélag og í gegnum það verkefni þurfum við að hlúa enn frekar að andlegri og líkamlegri heilsu íbúa. Það viljum við meðal annars gera með markvissri hækkun frístundastyrkja sem komið var á, á þessu kjörtímabli, ásamt því að leita leiða til þess að hafragrautur og ávaxtastund að morgni verði í boði í öllum grunnskólum sveitarfélagsins.

Það verður forgangsefni sveitarstjórnarfulltrúa Sjálfstæðisflokksins að mæta þeim áskorunum sem taldar eru upp hér að framan, sem og öðrum sem kunna að koma upp á komandi kjörtímabili með langtímalausnir í huga. Kjósendur hafa treyst Sjálfstæðisflokknum fyrir stjórn sveitarfélagsins ásamt samstarfsflokkum sínum frá árinu 2006 og undir forystu hans höfum við náð þangað sem við erum stödd í dag. Við viljum árangur áfram fyrir okkur öll!

Helena Eydís Ingólfsdóttir skipar annað sæti á lista Sjálfstæðisflokksins í Norðurþingi.