Kaelon P. Fox og Harpa Ásgeirsdóttir valin bestu leikmenn sumarsins hjá Völsungum

Verðlaunahafar á lokahófi Völsungs.

Kaelon P. Fox og Harpa Ásgeirsdóttir voru valin bestu leikmenn meistaraflokka Völsungs á lokahófi sem fram fór sl. laugardagskvöld.

Hófið, sem þótti vel heppnað, var haldið á Fosshótel þar sem Norðlenska bauð uppá listagott lambakjöt. 

Dagskrá var með hefðbundnu sniði og náði hápunkti þegar leikmenn og þjálfarar kjósa bestu og efnilegustu leikmenn sumarsins.

Uppskera sumarsins var góð. Stelpurnar urðu deildameistarar í sinni deild og spila í Inkasso deildinni að ári. Strákarnir enduðu sumarið vel með góðum sigri á heimavelli. Skilaði það liðinu í 6. sæti sinnar deildar.

Bestu leikmenn meistaraflokka voru kosin Harpa Ásgeirsdóttir og Kaelon P. Fox. Harpa er þaulreyndur leikmaður og var fyrirliði meistaraflokks kvenna sem hampaði deildarmeistaratitli í 2. deild kvenna. Fox var að spila sitt fyrsta tímabil með Völsungi og stimplaði sig rækilega inn í hjörtu Völsunga með góðri frammistöðu.

Efnilegustu leikmenn meistaraflokka voru kosin Árdís Rún Þráinsdóttir og Arnar Pálmi Kristjánsson. Árdís spilaði virkilega vel í stöðu hægri bakvarðar í sumar og stimplaði sig inn í lið Völsungs með stæl. Arnar Pálmi kom inn í vinstri bakvörð hjá strákunum eftir að Sigvaldi meiddist. Þá stöðu leisti hann fanta vel og endaði sumarið með stæl þegar hann skoraði sitt fyrsta mark fyrir meistaraflokk beint úr hornspyrnu.

Í 2. flokki karla var Arnar Pálmi valinn besti leikmaðurinn og Rafnar Máni Gunnarsson sá efnilegasti. Rafnar Máni hefur verið að spila vel í sumar sem varð til þess að hann stimplaði sig inn í meistaraflokk og tók þar þátt í 7 leikjum.

Þar að auki voru valdir Völsungar ársins í báum liðum. Völsungur ársins er valinn sá leikmaður sem er alltaf tilbúinn að fórna sér fyrir liðið hvort sem það er innan sem utan vallar. Er góður félags- og liðsmaður og alltaf tilbúinn að hvetja liðið sitt áfram. Að þessu sinni voru Arnhildur Ingvarsdóttir og Ófeigur Óskar Stefánsson sem hlutu verðlaunin Völsungur ársins.

Verðlaunahafra á lokahófi Völsungs 2019.

Á heimasíðu Völsungs má sjá fleiri myndir af verðlaunahöfum.