Grásleppan heiðruð á Bakkafirði um Sjómannadagshelgina

30. maí

Grásleppan heiðruð á Bakkafirði um Sjómannadagshelgina
Fréttatilkynning - - Lestrar 94

Í tilefni sjómannadagsins um næstu helgi verður grásleppan, þessi mikilvægi fiskur í sögu Bakkafjarðar, heiðruð með hátíðlegum hætti í vertíðarlok.

Boðið verður upp á stórkostlega matarupplifun til að kynna grásleppuna sem hráefni og möguleika á nýtingu hennar. Gestum verður boðið að smakka nýstárlega vöru í bland við hefðbundnari útfærslu á hráefninu.

Bakkasystur eiga veg og vanda að skipulagningu hátíðarinnar með stuðningi björgunarsveitarinnar Hafliða og íbúa og atvinnurekenda á svæðinu.

Fram kemur í fréttatilkynningu að hér skapist mikilvægt tækifæri til samverustundar íbúa og velunnara Bakkafjarðar, þar sem sérstök áhersla verður lögð á að kynna afurðina sem hefur verið staðnum svo mikilvæg.

Öll sem vilja taka þátt í að blása lífi í hátíðarhöld tengd sjómannadeginum á Bakkafirði og heiðra í leiðinni þennan gjöfula fisk og þau sem hann í sjóinn sækja eru hjartanlega velkomin!

Matarupplifunin er tengd verkefninu „Grásleppugæði - sælgæti sjávar“ sem unnið er í samstarfi Bakkasystra ehf., Bjargsins ehf., á Bakkafirði, ásamt Biopol ehf., á Skagaströnd og Háskólanum á Akureyri. Verkefnið miðar að þróun á matvælum í sjávarútvegi þar sem litið er til aukinnar sjálfbærni vegna þess að hráefnunum er hent að mestu í dag.

Hugmyndin að Grásleppugæði - sælgæti sjávar er að skapa nýjar afurðir úr grásleppu og auka þannig verðmætasköpun, skapa atvinnu í sjávarbyggðum og vinna nýja markaði erlendis. Verkefnið fékk nýverið styrk úr Lóu-nýsköpunarstyrk fyrir landsbyggðina, sem mun nýtast í áframhaldandi vöruþróun, fullvinna vöruflokka og koma þeim á markað.

Matreiðslumeistarinn Fanney Dóra Sigurjónsdóttir hefur yfirumsjón með matarupplifuninni, en hún er þekkt fyrir frumleika í matargerð og einbeitir sér að því að nýta hráefni úr nærumhverfi.

Á veitingastað hennar, Hnoss, er að finna dásamlegan rétt úr grásleppuhrognum frá Bakkafirði, sem vakið hefur mikla athygli.

Hátíðin fékk styrk úr Frumkvæðissjóði Betri Bakkafjarðar.

Grásleppan 2023 kemur til með að vekja athygli á Bakkafirði og þeim möguleikumsem finna má á svæðinu. Verkefninu er ætlað að vera jákvæð upplifun og hvetjandifyrir íbúa og velunnara og í framtíðinni fastur punktur í þorpslífinu, með þátttöku sem

flestra.

Dagskrá hátíðarinnar laugardaginn 3. júní.

13:00 - 15:00

Opið hús hjá Bjarginu, Kvalberg og GPG

Sýningin „Gunnólfsvíkurfjallið er svo blátt“ kynnt í Vigtarhúsinu við Bjargið.

14:00 - 15:00

Fjölskylduratleikurinn „Finndu grásleppuna“

15:00 - 16:00

Sjómannadagsleikir við Hafnargötu

16:00 - 20:00

Grásleppugæði - sælgæti sjávar: matarupplifun og menning í Arnarbúð (gamla

samkomuhúsinu).