Hagnaður af rekstri Sparisjóðs Suður-Þingeyinga 205 milljónir króna

Örn Arnar sparisjóðsstjóri og Jón formaður HSÞ.

Aðalfundur Sparisjóðs Suður-Þingeyinga var haldinn 8. maí s.l. í félagsheimilinu Breiðumýri í Reykjadal.

Rekstur sparisjóðsins gekk vel á síðasta ári, hagnaður af starfseminni var 204,7 milljónir króna eftir skatta.

Um síðustu áramót voru heildareignir sparisjóðsins 13,1 milljarðar króna og hafa aukist um 840 milljónir á milli ára. Innlán voru á sama tíma um 11,5 milljarðar. Eigið fé sparisjóðsins var 1,3 milljarður í árslok og lausafjárstaða er sterk.

Í stjórn sparisjóðsins voru kjörin Andri Björgvin Arnþórsson, Elísabet Gunnarsdóttir, Eiríkur H. Hauksson, Margrét Hólm Valsdóttir og Sigríður Jóhannesdóttir. Varamenn, Bergþór Bjarnason og Pétur B. Árnason.

Sparisjóðsstjóri og stjórn Sparisjóðs Suður-Þingeyinga: Frá vinstri, Örn Arnar Óskarsson sparisjóðsstjóri, Eiríkur Haukur Hauksson, Elísabet Gunnarsdóttir, Margrét Hólm Valsdóttir og Andri Björgvin Arnþórsson, Sigríði Jóhannesdóttur vantar á myndina.

Stuðningur við íþróttastarf barna og ungmenna HSÞ

Á aðalfundinum var tilkynnt að Sparisjóðurinn muni styrkja íþróttastarf barna og ungmenna hjá aðildarfélögum Héraðssambands Þingeyinga (HSÞ) um samtals 11 milljónir króna á árinu. Nánari útfærsla verður kynnt aðildarfélögunum á næstunni.

Örn Arnar Óskarsson sparisjóðsstjóri og Jón Sverrir Sigtryggsson formaður HSÞ.