Gamla myndin - Hjartatæki afhent

Ásgeir Böðvarsson og Svala Hermannsdóttir.

Gamla myndin að þessu sinni er frá desembermánuði 2004 og reyndar er um tvær myndir að ræða.

Þær voru teknar þegar Heilbrigðisstofnun Þingeyinga var afhent nýtt hjartaþolstæki og tilefni birtingarinnar er að nú er komið að endurnýjun á þessu tæki.

Neðri myndin birtist með eftirfarandi frétt í Morgunblaðinu en hin fær að fljóta með:

Heilbrigðisstofnun Þingeyinga hefur tekið í notkun nýtt hjartaþolspróftæki sem notað er til greiningar og eftirlits með hjartasjúklingum. Verðmæti tækisins er um tvær milljónir kr. Svala Hermannsdóttir, formaður Styrktarfélags Heilbrigðisstofnunarinnar, afhenti Ásgeiri Böðvarssyni lækni gjafabréf fyrir tækinu.

Ásamt Styrktafélagi Heilbrigðisstofnunar Þingeyinga eru gefendur meðal annars Lionsklúbbur Húsavíkur og hagyrðingafélagið Kveðandi sem stóðu fyrir skemmtisamkomu í fjáröflunarskyni til þessara tækjakaupa. Þá eru einnig sjö kvenfélög í Þingeyjarsýslu meðal gefenda ásamt ýmsum velunnurum Heilbrigðisstofnunar Þingeyinga.

Viðstöddum var sýnt hvernig tækið virkaði og þáverandi forstjóri HÞ Friðfinnur Hermannsson erfiðaði á þrekhjólinu sem var tengt við tækið. Hallgrímur læknir útskýrði þetta allt saman fyrir fólkinu.

Svala Hermannsdóttir, þáverandi formaður Styrktarfélags HÞ, afhenti Ásgeiri Böðvarssyni lækni gjafabréf fyrir tækinu.

Nú er komið að endurnýjun á þessu hjartaþolstæki eins og lesa má um hér