Gamla myndin - Fyrsti rafræni lyfseðillinn sendur

Guðni Kristinsson og Ingibjörg Pálmadóttir.

Gamla myndin að þessu sinni er frá marsmánuði 2001 þegar fyrsti rafræni lyfseðillinn á Íslandi var sendur á fimmtudag frá Heil-brigðisstofnun Þingeyinga til Húsavíkurapóteks.

Frá þessu sagði svo í Morgunblaðinu 23. mars 2001:

Fyrsti rafræni lyfseðillinn á Íslandi var sendur á fimmtudag frá Heilbrigðisstofnun Þingeyinga til Húsavíkurapóteks. Hann var fyrir Ingibjörgu Pálmadóttur heilbrigðisráðherra sem var gestur á Upplýsingatæknidegi á Húsavík. Sigurður Guðmundsson landlæknir sendi seðilinn.

Fyrirtækið Doc ehf. smíðaði hugbúnaðinn en hann gerir lækni kleift að nálgast allar fagupplýsingar um lyf um leið og lyfjum er ávísað á sjúkling. Ýmis öryggisforrit eru samkeyrð lyfseðlunum og gera þau læknum viðvart ef ávísun er frábrugðin ráðlagðri meðferð. Hugbúnaðurinn á að draga verulega úr hættu á mistökum við lyfjagjöf. Forritin láta lækninn vita um milliverkanir, skammtastærðir, frábendingar lyfja og einnig ef lyf þykir ekki henta sjúklingi í ljósi líkamsástands, lyfjasögu eða annarra sjúkdóma.

Heilbrigðisráðuneytið og Doc ehf. skrifuðu í gær undir samning um lyfseðilsgátt sem er hluti af íslenska heilbrigðisnetinu. Það er fyrsta skrefið í þá átt að gera Ísland að forystulandi í heiminum varðandi öryggi í lyfjamálum, segir í frétt frá ráðuneytinu.

Heilbrigðisráðherra, Ingibjörg Pálmadóttir, fær afhent lyf samkvæmt fyrsta rafræna lyfseðli sem sendur var í apótek.

Á myndinni þakkar Ingibjörg Guðna Kristinssyni, apótekara í Húsavíkur-apóteki, viðskiptin.