Bætt heilsa er allra hagur, alltaf.

Hjálmar Bogi Hafliðason.

Almenn eining ríkir um að gera þurfi betur í heilbrigðismálum á Íslandi, en hvaða mál eru heilbrigðismál?

Heilbrigðismál snerta hag okkar allra! Umræðan um heilbrigðismál stendur fólki nærri. Sumir stjórnmálamenn halda því fram að heilbrigðiskerfið sé hrunið. Slíkt tal hughreystir engan. Leitum leiða til að bæta það og styrkja. En hvað á stjórnmálamaður sem stýrir samfélaginu við þegar hann segir; „við verðum að bæta heilbrigðiskerfið‟?

Kynslóðin sem erfir landið

Geðheilbrigði ber kannski hæst í umræðunni. En hvers vegna? Með forgangsröðun fjármuna getum við bætt við geðlæknum, sálfræðingum og ýmis konar aðstoð. Við verðum líka að líta á skrefin á undan og spyrja; hvers vegna leita fleiri og fleiri einstaklingar sér aðstoðar á þessu sviði? Er eitthvað í samfélagsgerðinni? Getum við eflt forvarnir, stuðlað að aukinni hreyfingu meðal barna og ungmenna, mætt áhugahvötinni betur í menntakerfinu þannig að allir fái notið sín? Byggt íþróttamannvirki og tómstundaaðstöðu fyrir unga fólkið og aukið tækifæri til skapandi frístundastarfs! Eins og Vilhjálmur Vilhjálmsson, söng í laginu, Ég labbaði í bæinn; „Ég held við ættum stundum að hlusta aðeins betur á hugrenningar þeirra, sem erfa skulu land, því kannski er næsta kynslóð, kynslóðin sem getur komið fram með svörin, þar sem sigldum við í strand‟. Svarið við því er bætt lýðheilsa, andleg og líkamleg.

Aðgengi allsstaðar

Aðgengi fólks utan höfuðborgarsvæðisins að hvers konar læknisþjónustu er víða óboðleg. Til að bæta úr þarf tvennt að gerast; annarsvegar að efla fjarlækningar og hinsvegar grunnþjónustuna sem næst íbúum. Til að fjarlækningar geti nýst í landsbyggðunum þarf að styrkja fjarskipti og þjálfa fólk í að nýta tæknina. Til að laða heilbrigðisstarfsfólk til búsetu á landsbyggðunum eigum við að nota skattalega hvata meðal annars veita afslátt af endurgreiðslu námslána. Er það möguleiki?

Brýn þörf fyrir uppbyggingu

Fólkið sem byggði upp landið á skilið áhyggjulaust ævikvöld. Tryggjum að svo megi vera. Til þess þarf að treysta þjónustu í heilbrigðiskerfinu þannig að einstaklingar geti búið sem lengst heima við. Á sama tíma eigum við að huga að því að kjósi einstaklingur að vinna lengur en til sjötugs geti hann gert það án skerðingar bóta. Við þurfum að byggja þjónustuíbúðir og hjúkrunarrými fyrir aldraða sem þurfa slíka þjónustu. Framsókn vill að í samstarfi við lífeyrissjóðina að fjárfest verði fyrir minnst 10 milljarða árlega til uppbyggingar á 300 hagkvæmum íbúðum og hjúkrunarrýmum fyrir aldraða í þeim sveitarfélögum þar sem þörfin er brýnust. 

   Framsóknarmenn eru sammála um að þrjú verkefni þola ekki bið. Þjónustan við aldraða, bygging þjóðarsjúkrahúss og efling heilsugæslunnar og lýðheilsa. Framsókn vill greina hvar brýnasta þörfin er fyrir grunnþjónustu, styrkja hana og tryggja að önnur kerfi samfélagsins vinni með heilbrigðiskerfinu við að stuðla að heilbrigði þjóðarinnar.

Hjálmar Bogi Hafliðason

4. sæti í Norðausturkjördæmi

Framsóknarflokkurinn