Áskoranir og lausnir

Þórunn Egilsdóttir.

Einn af kostunum við kosningabaráttu er að hún gefur tilefni til þess að ferðast ennþá meira um kjördæmið, hitta fólk og velta fyrir sér og ræða þær áskoranir sem kjördæmið þarf að takast á við.

Áskoranir sem sumar hverjar eru óþægilega kunnuglegar frá þeim tíma sem ég starfaði í sveitarstjórn og jafnvel frá þeim tíma sem ég flutti fyrst frá Reykjavík og í Vopnafjörð fyrir rúmum 30 árum.

Betri samgöngur

Samgöngumál eru lykillinn að jákvæðri þróun samfélagsins á Austurlandi. Vegakerfið hefur þurft að þola svelti allt of lengi ásamt því að aðrir innviðir þurfa á verulegri fjárfestingu að halda. Það er þess vegna sem Framsóknarflokkurinn vill nota ríflegan afgang af ríkisrekstri til að fjárfesta 20 milljörðum í betra heilbrigðiskerfi, meiri lífsgæðum og betri samgöngum úti um allt land.

Fjarlægð Austurlands frá höfuðborgarsvæðinu er áskorun, bæði fyrir þá sem þangað vilja og þurfa að sækja þjónustu, en eins fyrir þá sem vilja halda tengslum við fjölskyldu og vini á hinum enda landsins. Framsóknarflokkurinn hefur hlustað á raddir þeirra sem talað hafa fyrir hinni svonefndu skosku leið í innanlandsflugi og mun beita sér fyrir því að hún verði farin hér á landi, sem leiða myndi til allt að helmings lækkunar á flugfargjöldum fyrir íbúa á Austurlandi.

Kæfum ekki vaxtarsprotana

Á Austurlandi eru að byggjast upp öflug fyrirtæki í ferðaþjónustu. Ennþá er þó svæðið skemmra á veg komið en suðvesturhornið, bæði hvað varðar lengd ferðatímabils, fjölda ferðamanna og uppbyggingu á ferðamannastöðum. Framsóknarflokkurinn telur þess vegna ótímabært að hækka virðisaukaskatt á ferðaþjónustuna meðan á uppbyggingunni stendur.

Framsóknarflokkurinn telur hins vegar rétt að innheimta hófleg komugjöld af ferðamönnum sem nýta á til uppbyggingar innviða til að taka á móti ferðamönnum. Auk þess á að tryggja að gistináttagjaldið verði látið renna til sveitarfélaganna sem tekjustofn til að takast á við að sinna auknum fjölda ferðamanna.

Við í Framsóknarflokknum erum stolt af stefnunni og fólkinu okkar sem býður sig fram til að framfylgja henni. Við biðjum um ykkar stuðning til að svo megi verða.

Þórunn Egilsdóttir

Oddviti B-lista Framsóknarflokks

Norðausturkjördæmi