Vaðlaheiðargöng opnuð fyrir umferð

Vaðlaheiðagöng voru opnuð fyrir umferð nú kl. 18.

 

Á Fésbókarsíðu fyrirtækisins segir að það sé Vaðlaheiðargöngum hf. afskaplega gleðilegt að geta gefið Norðlendingum og landsmönnum öllum þá jólagjöf að geta nú loksins ekið í gegnum göngin.

 

Jafnframt er öllum þeim sem lögðu hart að sér til að þetta mætti takast núna fyrir jólin færðar innilegar þakkir fyrir þeirra góða starf.

 

Í tilkynningunni segir að þessu hafi verið unnið hörðum höndum síðustu sólarhringa og er í samræmi við það sem kom fram á fréttamannafundi 11. desember sl., að stefnt væri að því að opna göngin fyrir umferð fyrir jól. Og það tókst. Í dag lauk öryggisprófunum og öllu sem þurfti að ljúka áður en göngin yrðu opnuð fyrir umferð". Göngin voru síðan opnuð fyrir umferð kl. 18:00 í dag eins og áður segir.

Eins og fram kom á fréttamannafundi Vaðlaheiðarganga hf. 11. desember sl. hefur verið ákveðið að göngin verði öllum opin án endurgjalds til 2. janúar 2019, þegar gjaldtaka í göngin hefst. Formleg opnun ganganna verður 12. janúar nk. Nánar um það síðar.