Stefán Pétur Sólveigarson nýr verkefnastjóri hjá ÞÞ

Stefán Pétur Sólveigarson. Ljósmynd hac.is

Stefán Pétur Sólveigarson hefur verið ráðinn í nýtt starf hjá Þekkingarneti Þingeyinga.

Um er að ræða starf verkefnastjóra í nýsköpun á Húsavík.

Stefán Pétur hefur starfað sem vöruhönnuður undan-farin ár og hefur margvíslega reynslu og menntun á sviði hönnunar og nýsköpunar.

Í tilkynningu á heimasíðu ÞÞ segir að Stefán Pétur muni leiða uppbyggingarstarf á sviði nýsköpunar á Húsavík í samstarfi við stjórnendur og starfsfólk Þekkingarnetsins.

Meðal verkefna verður uppsetning og mótun Fab-lab smiðju, stofnun frumkvöðlaseturs og tengslamyndun innan og utan lands í tengslum við þessa starfsemi. Þá mun Stefán Pétur koma að vinnu við þróun húsnæðiskosts og útfærslu kringum það á næstu mánuðum.

Stefán Pétur hyggst flytja til Húsavíkur með fjölskyldu sinni á komandi sumri til að sinna starfinu og mun hefja störf á næstu vikum.