Orkugangan - Lengsta skíðaganga landsins

Buch-Orkugangan er 60 km. skíðaganga sem haldin verður laugardaginn 12. apríl nk. kl. 10:00.

Hefst gangan við Kröfluvirkjun í Mývatnssveit og lýkur henni í nágrenni Húsavíkur. Er þetta lengsta skíðagangan hér á landi og gefur hún stig til Íslandsgöngunnar. Orkugangan er í umsjón Skíðagöngudeildar Völsungs og hefur verið haldin árlega síðan árið 2007. Gengið verður að mestu um ósnortið land, þar sem sjá má margar náttúruperlur sem og svæði sem jarðskjálftar og eldsumbrot hafa mótað og má víða enn sjá merki um þá orku sem býr í þessu svæði.

Leiðin er troðin fyrir þátttakendur og lagt verður spor alla leið.
Lítið er um erfiðar brekkur og lækkun á leiðinni er um 350 metrar.
Það er álit margra að fallegri leið sé vandfundin.
Drykkjarstöðvar verða á 10 - 15 km. fresti.

Í ár hafa tvær norskar göngukonur boðað komu sína, Lisbeth Weltha og Ingunn Fjørtoft, reynslumiklar konur sem hafa gengið m.a., Vasa, Marcialonga, Helterenne, Birkibeiner og Skarvrennet.

Sama dag verða gengnir 25, 10 og 1 km. Ræsing í 25 km göngu er við Þeistareyki kl. 11:00, ræsing í 10 km í nágrenni Höskuldsvatns kl. 12:00 og 1 km ganga á neðra svæði gönguskíðamanna í nágrenni Húsavíkur hefst kl. 13:00.
25 km. og 10 km. göngurnar eru í sömu braut og 60 km. gangan og allir enda á sama stað. Þátttökuverðlaun fyrir alla sem klára. 

Sameiginleg verðlaunaafhending og kjötsúpa verður svo á Fosshótel Húsavík eftir gönguna.

Allar nánari upplýsingar og rafræna skráningu er að finna á vefsíðu Orkugöngunnar á slóðinni www.orkugangan.is eða í netfang info@orkugangan.is

Upplýsingar eru einnig veittar hjá Jónu í síma 866-1848.

Gerð hafa verið myndbönd frá göngunni í fyrra og hér að neðan er hægt að skoða þau. Efra myndbandið er stytt útgáfa.