Nýtt fyrirkomulag við rjúpnaveiðar sem hefjast 25. október

Guðlaugur Þór Þórðarson, umhverfis-, orku- og loftslagsráðherra, hefur staðfest tillögur Umhverfisstofnunar að fyrirkomulagi rjúpnaveiða fyrir árið 2024.

Þessu til staðfestingar hefur verið gefin út reglugerðarbreyting 1080/2024 á reglugerð nr. 456/1994 um fuglaveiðar og nýtingu hlunninda af villtum fuglum.

Nýtt kerfi veiðistjórnunar

Tillögurnar voru unnar eftir nýju veiðistjórnunarkerfi sem tekið var upp með stjórnunar- og verndaráætlun rjúpu sem ráðherra undirritaði þann 11. september síðastliðinn.

Veiðidagar verða heilir og heimilt er að veiða frá og með föstudögum til og með þriðjudögum innan veiðitímabils. Landinu er skipt upp í sex mismunandi svæði og ný stofnlíkön hafa reiknað út ákjósanlega lengd tímabils á hverju svæði fyrir sig.

Veiðidögum í ár er skipt milli veiðisvæða með eftirfarandi hætti.

Vesturland: 20 dagar. 25.október til 19.nóvember

Vestfirðir: 25 dagar. 25.október til 26.nóvember

Norðvesturland: 20 dagar. 25.október til 19.nóvember

Norðausturland: 20 dagar. 25.október til 19.nóvember

Austurland: 43 dagar. 25.október til 22.desember

Suðurland: 20 dagar. 25.október til 19.nóvember

ust.is