Mjög slæm för eftir utanvegaakstur ​í Bjarnarflagi

Umhverfisstofnun hefur borist ábending um utanvegaakstur í Bjarnarflagi í Mývatnssveit.

Í eftirlitsferð komu mjög slæm för í ljós eftir akstur mótorkrosshjóla í sendnum mel, hann er útspólaður og með djúpum förum.

Af ummerkjum að dæma hefur aksturinn átt sér stað á allra síðustu dögum. 

Í tilkynningu segir að stofnunin muni vísa þessum náttúruspjöllum til lögreglunnar á Norðurlandi Eystra.

Umhverfisstofnun hafa ítrekað borist ábendingar um skemmdarakstur mótorkrosshjóla í náttúru landsins undanfarin misseri.  Vill stofnunin ítreka að þessi akstur vélknúinna hjóla er brot á náttúruverndarlögum. Sérstök mótorkrosssvæði hafa verið byggð upp víðsvegar um landið í þeim tilgangi að skapa vettvang fyrir þessa iðju.

Meðfylgjandi mynd tók landvörður Umhverfisstofnunar.