Lionsmenn styðja við ungliðastarf björgunarsveitarinnar

Tryggvi afhendir hér Birgi gjafabréfið.

Aðalgeir Bjarnason og Tryggvi Finnsson félagar í Lionsklúbbi Húsavíkur komu færandi hendi í Naust, húsnæði Björgunarsveitar-innar Garðars, í kvöld.

Þar afhentu þeir gjafabréf upp á hálfa milljón króna sem veittar eru til þessa að efla starf, þjálfun og fræðslu ungliðadeildar Garðars sem ber nafnið Náttfari.

Hluti upphæðarinnar hefur þegar verið nýttur til kaupa á tuttugu flotbjörgunargöllum fyrir ungliðadeildina. 

Tryggvi sagði við þetta tækifæri það vera okkur öllum ljóst sem hér búum að ef það er eitthvað sem er lífsnauðsynlegt þá er það að hafa góða björgunarsveit. En það verður ekki til lengri tíma góð björgunarsveit nema yngri kynslóðin sé á næsta leyti og tilbúin að taka við keflinu. Það sé því sönn ánægja fyrir Lionsklúbb Húsavíkur að geta stutt við starfið með þessum hætti.

Ungliðahópurinn telur í dag 15-16 manns og eru Sigrún Karlsdóttir, Hilmar Freyr Birgisson og Atli Jespesen umsjónarmenn starfsins. 

Ef einhverjir hafa áhuga á að starfa í ungliðadeild Björgunarsveitarinnar Garðars er alltaf pláss og um að gera að hafa samband við sveitina. 

Birgir Mikaelsson formaður Björgunarsveitarinnar Garðars tekur hér við gjafabréfinu úr hendi Tryggva Finnssonar.

Ungliðar ásamt umsjónarmönnum ungliðastarfsins, þeim Hilmari Frey Birgissyni, Sigrúnu Karlsddóttur tv. og Atla Jespesen.

Ungliðar í göllunum góðu sem keyptir voru fyrir gjafafé frá Lionsklúbbi Húsavíkur.