Guðrún Ingimundardóttir ráðin skólastjóri Tónlistarskóla Húsavíkur

Guðrún Ingimundardóttir.

Guðrún Ingimundardóttir hefur verið ráðin skólastjóri Tónlistarskóla Húsavíkur í stað Árna Sigurbjarnarsonar og mun hún hefja störf 1. ágúst.

Í tilkynningu segir að Guðrún, sem er fædd og uppalin á Húsavík, hafi lokið bakkalársprófi úr tónfræði-deild Tónlistarskólans í Reykjavík 1987 með tónsmíðar, tónfræði, píanó og söng sem aðalgreinar.

Hún lauk meistaragráðu í tónsmíðum og tónfræði frá University of Arizona árið 1990 og doktorsgráðu í tónsmíði og tónfræði frá University of Arizona árið 2009.

Guðrún hefur starfað sem tónlistar- og tónsmíðakennari frá 2005 og sem aðstoðarskólastjóri og staðgengill skólastjóra Tónlistarskóla Akureyrar frá 2016. Þá hefur Guðrún starfað sem verkefna- framkvæmda- og fjármálastjóri hinna ýmsu lista- og menningarverkefna, hátíða og ráðstefna.

Guðrún hefur einnig haft umsjón með þróun námsleiða í tónlist í leik-, grunn- og framhaldsskólum á Akureyri.