Undirrituðu yfirlýsingu um ábyrga ferðaþjónustu

Viljayfirlýsingin undirrituð á Húsavík.

Í dag undirrituðu forsvarsfólk um 200 fyrirtækja undir yfirlýsingu um ábyrga ferðaþjónustu.

Undirritunin fór fram í Háskólanum í Reykjavík að viðstöddum forseta Íslands, Guðna Th. Jóhannessyni, sem er verndari verkefnsins.

Það eru Festa – miðstöð um samfélagsábyrgð og Íslenski ferðaklasinn sem standa að verkefninu í samstarfi við Ferðamálastofu, SAF, Íslandsstofu, Stjórnstöð ferðamála, Markaðsstofur landshlutanna, Höfuðborgarstofu og Safetravel.

Ábyrg ferðaþjónusta er hvatningarverkefni um að fyrirtæki tengd ferðaþjónustu sammælist um nokkrar skýrar og einfaldar aðgerðir um ábyrga ferðaþjónustu.

Tilgangur verkefnisins er að stuðla að því að Ísland verði ákjósanlegur áfangastaður ferðamanna um ókomna tíð sem styður við sjálfbærni fyrir komandi kynslóðir þjóðarinnar.

Yfirlýsingunni verður fylgt eftir með fræðsludagskrá fyrir fyrirtæki um samfélagsábyrgð og sjálfbærni.

Á sama tíma var yfirlýsingin einnig undirrituð í húsnæði Þekkingarnets Þingeyinga á Húsavík, í húsnæði Markaðsstofu Norðurlands á Akureyri, í húsnæði  Austurbrúar á Reyðarfirði og í húsnæði Markaðsstofu Vestfjarða á Ísafirði.

Frá undirritun yfirlýsingar um ábyrga ferðaþjónustu á Húsavík í dag.