Sigur hjá Völsungsstelpunum í síðasta leik í Mizunodeildinni

Sladjana var stigahæst í leiknum með 16 stig.

Völsungur sótti Aftureldingu heim í Mizunodeild kvenna í gærkvöldi en bæði lið voru að leika sína síðustu deildarleiki í vetur.

Blakfréttir.is segja svo frá leiknum:

Leikurinn fór fram í Varmá og stillti Afturelding upp ungu og efnilegu byrjunarliði. Meðalaldur Aftureldingar var í kringum 19 ár en alls voru 5 leikmenn úr byrjunarliðinu fæddar árið 2000.

Einhvað virtust þessar ungu og efnilegu stelpur vera taugastrektar í byrjun leiks því Völsungur náði góðu forskoti strax í fyrstu hrinu. Völsungur átti í raun ekki í miklum vandræðum í leiknum sem lauk með 3-0 sigri Völsungs (25-12, 25-16, 25-11). Afturelding gat leyft sér að hvíla flestar af sínum sterkustu stelpum og gefa öðrum tækifæri. Leikurinn var afar þýðingalítill því bæði lið gátu ekki farið ofar né neðar í Mizunodeildinni.

Stigahæst í leiknum var Sladjana Smiljanic leikmaður Völsungs með 16 stig. Stigahæst í liði Aftureldingar var Þórey Símonardóttir með 5 stig.

Afturelding endar því deildarkeppnina með 38 stig í 2.sæti. Völsungur endar með 23 stig í 5.sæti en Völsungur var líkt og Afturelding að leika sinn síðasta deildarleik í vetur.

Völsungur mætir HK í 1. umferð úrslitakeppninnar.

(blakfrettir.is)