Kalla ekki allt ömmu sína - Komnir heim eftir átta tíma ferð til AkureyrarAlmennt - - Lestrar 396
Bílar frá Björgunarsveitinni Garðari komu í hús rétt fyrir tiu í kvöld eftir um átta tíma erfitt ferðlag til Akureyrar og heim aftur.
Bílarnir lögðu í hann rétt fyrir kl. 14 í dag með sjúkling sem komst þurfti í flug á Akureyri en ófærð var og hríðarbylur.
Sagt er frá þessari ferð á fréttavef Morgunblaðsins í kvöld:
Það tók björgunarsveitarmenn um fimm klukkustundir að flytja sjúkling frá Húsavík til Akureyrar í dag. Liðsmenn björgunarsveitarinnar Garðars á Húsavík kalla hins vegar ekki allt ömmu sína og náðu að komast á leiðarenda þrátt fyrir ófærð og hríðarbyl. Á góðum degi tekur ferðalagið um klukkustund en vegalengdin á milli bæjarfélaganna er um 90 km.
Guðmundur Salómonsson er félagi í Garðari og situr í svæðisstjórn björgunarsveita í Þingeyjarsýslum. Hann segir í samtali við mbl.is að rúmlega 13 í dag hafi borist boð um að flytja sjúkling frá Húsavík til Akureyrar. Guðmundur tekur fram að maðurinn hafi ekki verið bráðveikur heldur hafi hann þurft að komast í flug til Reykjavíkur þar sem hann átti að gangast undir hjartaþræðingu á Landspítalanum á morgun.
„Það er búið að vera skítaveður hér og allt ófært, þannig að það hefur gengið heldur brösuglega, “ segir Guðmundur sem hefur verið í sambandi við hópinn sem sá um að flytja manninn í dag. Þegar mbl.is sló á þráðinn til Guðmundur um kl. 20 í kvöld var hópurinn, sem telur níu manns, á heimleið, en færðin hefur ekkert skánað.
Björgunarsveitarmenn á tveimur vel útbúnum jeppum lögðu af stað rétt fyrir klukkan 14 í dag. Guðmundur segir að ferðin inn í Ljósavatnsskarð hafi gengið vel en þegar þangað var komið tók ófærðin sem tafði för.
Aðspurður segir Guðmundur að menn verði að beita lagni og sýna þolinmæði þegar tekist er á við náttúruöflin. „Menn voru að festa sig og það þurfti að draga, en þess vegna förum við náttúrulega á tveimur bílum,“ segir hann.
„Svo var Víkurskarðið verulegur farartálmi, eins og við vissum fyrirfram,“ bætti Guðmundur við. Þar nutu þeir aðstoðar björgunarsveitarinnar Súlna frá Akureyri, en liðsmenn sveitarinnar mættu þeim á snjóbíl. „Bílarnir geta svo betur keyrt í slóðinni eftir snjóbílinn. Þannig að það gekk mjög vel niður úr Víkurskarðinu eftir að snjóbíllinn kom á staðinn.“
Guðmundur segir að menn njóti verksins þegar vel gengur. „Menn sjá ekkert eftir sér í það,“ segir hann að lokum.
Meðfylgjandi myndir úr ferðinni eru fengar af Fésbókarsíðu Björunarsveitarinnar Garðars
Snjóbíllin frá Súlum kominn til aðstoðar í Víkurskarði.
Það er nauðsynlegt að vera á vel útbúnum bílum í ferðum sem þessari.