Jarðvegsframkvæmdir hafnar vegna sjóbaðanna

Framkvæmdir vegna uppbyggingar sjóbaða hafnar.

Framkvæmdir hófust vegna uppbyggingar sjóbaða á Húsavíkurhöfða sl. föstudag.

Trésmiðjan Rein er aðalverktaki við framkvæmdirnar en Jón Ingi Hinriksson ehf. í Mývatnssveit er undirverktaki við jarðvegs-framkvæmdirnar.

"Við reiknum með að byrja uppsteypu í júní, núna er verið að vinna í að búa til veg að sjálfri byggingunni og svokallað lagerpláss á tilvonandi bílastæði en þar verðum við með þann búnað sem við þurfum til steypuvinnu. 

Við verðum með sex til átta manns í uppsteypu og bætum væntanlega aðeins í það þegar við komumst undir þak". Sagði Ragnar Hermannson hjá Rein í stuttu spjalli við 640.is.

Að sögn Ragnars er miðað við að byggingin verði afhent til reksturs næsta vor ef verkið gengur samkvæmt áætlun.

Það er gaman a segja frá því að Ragnar og félagar verða með myndavél staðsett upp í vitanum sem tekur svokallð timelapsmyndband sem mun sýna framkvæmdirnar skref fyrir skref. Það verður aðgengilegt á veraldarvefnum að framkvæmdum loknum.

Á þessari loftmynd Gauks Hjartarsonar sést staða framkvæmda sl. laugardagskvöld.

Framkvæmdir eru hafnar við vegargerð að fyrirhuguðum byggingarstað sjóbaðanna.