GeoSea sproti ársins

Sjóböðin á Húsavíkurhöfða.

Markaðsstofa Norðurlands veitti þrjár viðurkenningar á Uppskeru-hátíð ferðaþjónustunnar á Norðurlandi, sem var haldin í Hörgarársveit og Dalvíkurbyggð að þessu sinni.

Viðurkenningarnar eru sproti ársins, fyrirtæki ársins og störf í þágu ferðaþjónustu á Norðurlandi.

Að þessu sinni var GeoSea - Sjóböðin á Húsavík valið sproti ársins, fyrirtækin Ektafiskur og Hvalaskoðun á Hauganesi fengu sameiginlega viðurkenningu fyrir fyrirtæki ársins og að lokum var það Skagfirðingurinn Evelýn Ýr Kuhne sem hlaut viðurkenningu fyrir störf í þágu ferðaþjónustu. 

Viðurkenningin Sproti ársins er veitt ungu fyrirtæki sem hefur skapað eftirtektarverða nýjung í ferðaþjónustu á Norðurlandi.

Í umfjöllun um GeoSea - Sjóböðin segir:

"Böðin voru formlega opnuð á síðasta ári og sjaldgæft er að sjá nýja afþreyingu slá jafn rækilega í gegn. Upplifunin er enda einstök og allar ljósmyndirnar sem hafa verið teknar af böðunum, frá öllum mögulegum sjónarhornum, sýna það einnig hversu einstök staðsetningin og hönnunin á böðunum er.

Í sumar komust böðin á lista fyrir 100 bestu áfangastaði heims hjá tímaritinu Time, sem vakti enn frekar athygli á þessari spennandi nýjung í norðlenskri ferðaþjónustu. Með tilkomu GeoSea styrktist enn frekar sérstaða Norðurlands hvað fjölbreytileika í böðum varðar.

Allt vinnur þetta enn frekar að því að styrkja Norðurland sem spennandi áfangastað og við óskum GeoSea áframhaldandi velgengni" segir í frétt á heimasíðu Markaðsstofu Norðurlands en þar má einnig lesa umfjallanir um fyrirtæki ársins og störf í þágu ferðaþjónustunnar.