Gamla myndin - Völsungum vel fagnað við heimkomuna

Völsungum vel fagnað við heimkomuna.

Gamla myndin að þessu sinni var tekin í lok nóvember 2003 og sýnir Íslandsmeistara Völungs í knattspyrnu innanhúss.

Morgunblaðið sagði svo frá:

Þeim var vel fagnað Íslandsmeisturum Völsungs í innanhúsknattspyrnu karla þegar þeir komu heim til Húsavíkur undir miðnætti sl. sunnudag með Íslandsmeistarabikarinn í farteskinu. Leikmenn voru eðlilega orðnir nokkuð slæptir eftir helgina því strax að loknu móti var sest upp í einkabílana og ekið heim á leið. Ekki komu þó allir leikmenn liðsins heim þar sem sumir þeirra dvelja við nám og störf í Reykjavík og á Akureyri og eins er þjálfari liðsins Ásmundur Arnarsson búsettur syðra. Við athöfn í íþróttahöllinni færðu þau Linda Margrét Baldursdóttir, formaður Völsungs, og Sigurgeir Stefánsson leikmönnunum blóm fyrir þennan góða árangur. Þetta mun vera í fyrsta skipti í sögu Völsungs sem knattspyrnulið þess vinnur sigur í efstu deild og ljóst að þjálfarinn Ásmundur Arnarsson og aðstoðarmaður hans, Sigmundur Hreiðarsson, standa sig vel með þetta lið.

Höskuldur Skúli Hallgrímsson, formaður knattspyrnudeildar, var að vonum ánægður með sína menn. "Árangur liðsins hefur verið frábær á þessu ári, fyrst varð 2. flokkur Íslandsmeistarar í innanhússknattspyrnu og í sumar varð Völsungur svo Íslandsmeistari í 2. deild. Hið skemmtilegasta við þetta allt saman er sú staðreynd að allir þeir sem spiluðu um helgina eru heimamenn nema Mývetningurinn Baldur Sigurðsson, en hann hefur spilað með okkur frá því í 4. flokki," sagði Höskuldur Skúli.

Arngrímur Arnarson fyrirliði sagði árið í ár hafa verið mjög skemmtilegt.

"Við æfðum virkilega vel síðasta vetur og lögðum mikla vinnu á okkur og það hefur skilað sér í þeim góða árangri sem hópurinn hefur náð á þessu ári. Starfið í kringum knattspyrnuna hérna er mjög öflugt og mikill metnaður lagður í allt, hvort sem það er þjálfun, rekstur eða eitthvað annað," sagði Arngrímur.

Þetta voru ekki einu ánægjulegu tíðindin um helgina hjá knattspyrnumönnum Völsungs því 4. flokkur stelpna tók þátt í Norðurlandsriðli Íslandsmótsins í innanhússknattspyrnu. Stelpurnar gerðu sér lítið fyrir og sigruðu í riðlinum og unnu sér þar með sæti í úrslitakeppni Íslandsmótsins innanhúss í sínum flokki. Þetta mun vera í fyrsta skipti sem kvennalið í knattspyrnu frá Völsungi kemst áfram í úrslitakeppni í Íslandsmótinu innanhúss.

Meisturum fagnað: Frá vinstri Róbert Skarphéðinsson, Arngrímur Arnarson, Hermann Aðalgeirsson, Baldur Sigurðsson, Guðmundur Óli Steingrímsson, Birkir Vagn Ómarsson og Arnar Þór Sigurðsson.