Gamla myndin-Veðursæld á SkjálfandaGamla myndin - - Lestrar 772
Gamla myndin sem birtist að þessu sinni var tekin þann 1. september 2001, tíu dögum fyrir árásina á Tvíburaturnana í New York.
Veðursæld var á Skjálfanda þann dag og birtist eftirfarandi frétt á fréttavef Morgunblaðsins:
"Það hafa fleytur af öllum stærðum og gerðum verið á ferð um Skjálfanda í góða veðrinu í dag. Sjómenn réru til fiskjar bæði atvinnumenn og áhugamenn Hvalaskoðunarbátarnir fóru sínar ferðir að vanda. Skemmtiferðaskipið Evrópa sem skráð er í Nassau á Bahmaeyjum lá fyrir akkerum skammt fyrir utan höfnina á Húsavík. Vegna stærðar sinnar kemst það ekki að bryggju. Það var því mikil umferð um höfnina þegar farþegar skipsins voru ferjaðir í land á léttabátum þess.
Á milli sjötíu og áttatíu farþegar af skipinu stigu beint um borð í hvalaskoðunarbátinn Náttfara þegar að landi kom og héldu til hafs á ný, nú að skoða hvali út á flóanum. Fréttaritari Morgunblaðsins brá sér með Sigurgeiri Smára Harðarsyni, skipstjóra á aflaskipinu Náttfara ÞH 6, út að skipinu til að taka myndir. Þess ber að geta að Náttfari ÞH 6 er ekki hvalaskoðunarbáturinn Náttfari sem getið var um hér að ofan heldur hobbybátur þ.a.s. það má veiða í soðið á honum".
Svo mörg voru þau orð en snúum okkur að gömlu myndinni sem tekin var úr Náttfara hans Geira Harðar og sýnir þá bræður úr Árholti, Baldur og Garðar Jónassyni, sem voru á sjóstöng á Palla ÞH 57.
Með því að smella á myndina, sem var tekin á fyrstu stafrænu myndavél ljósmyndarands og gæðin eftir því, má skoða hana í stærri upplausn.