Gamla myndin - Síðasti formlegi fundur Sögunefndar Húsavíkur

Það lá vel á sögunefndarmönnum.

Gamla myndin sem hér birtist var tekin í októbermánuði 2003 þegar Sögunefnd Húsavíkur hélt sinn síðasta formlega fund.

Það lá vel á sögunefndarmönnum enda sáu þeir fyrir endann á miklu verki sem verið hafði í gangi í nokkra áratugi. 

Morgunblaðið birti eftirfarandi frétt af þessum sögulega fundi:

Það lá vel á mönnum þegar síðasti formlegi fundur Sögunefndar Húsavíkur var haldinn á dögunum enda sáu þeir nú loks fyrir endann á miklu verki sem verið hefur í gangi í nokkra áratugi. Þar er um að ræða V. og síðasta bindi af Sögu Húsavíkur í ritstjórn Sæmundar Rögnvaldssonar sagnfræðings og mun koma út nú fyrir jólin. Í þessu bindi er m.a. fjallað um verslun, þjónustu, samgöngur og stétta- og starfsgreinafélög. Einnig verður þar að finna allar lykilskrár fyrir bindin fimm, þ.e. heimildaskrá, nafnaskrár, atriðisorðaskrá og myndaskrá. Bindin fimm eru rúmlega 2000 blaðsíður og annar eins fjöldi ljósmynda prýðir verkin

Að sögn Guðna Halldórssonar, forstöðumanns Safnahúss Þingeyinga og eins nefndarmanna í sögunefnd, hóf Karl Kristjánsson efnisöflun skömmu fyrir 1970 til ritverks um Sögu Húsavíkur. Upphaflega var gert ráð fyrir að þetta yrði tveggja binda verk en þegar Karl lést árið 1978 var 1. bindi óútkomið. Það kom í hlut sonar hans, Kristjáns Karlssonar, og Ingimundar Jónssonar að sjá um útgáfuna á 1. bindi sem kom út árið 1981. Séra Björn H. Jónsson var ráðinn til að vinna að áframhaldi verksins og 1990 var Sæmundur Rögnvaldsson ráðinn að verkinu og vann hann úr efni því sem Björn og Karl höfðu safnað, uppfærði og bætti við. II. bindi Sögu Húsavíkur kom út 1998, III. bindi hennar 1999, IV. bindi 2001 og nú kemur út V. og síðasta bindi verksins. 

Fyrsti formlegi fundur Sögunefndar Húsavíkur var haldinn 16. febrúar 1988 og hafa einungis fimm menn átt sæti í henni frá upphafi. Það eru þeir Sigurjón Jóhannesson, Þormóður Jónsson og Guðni Halldórsson sem fylgja verkinu nú á lokasprettinum og áður fyrr þeir Jóhann Hermannsson og Finnur heitinn Kristjánsson.

Reinhard Reynisson þáverandi bæjarstjóri, Sigurjón Jóhannesson, Guðni Halldórsson, Sæmundur Rögnvaldsson og Þormóður Jónsson.

Með því að smella á myndina er hægt að skoða hana í stærri upplausn.