Fækkun sýslumannsembætta á landinu

Svavar Pálsson, sýslumaður á Húsavík

Skipað hefur verið í ný sýslumannsembætti á landinu en þeim verður fækkað úr 24 í 9. Svavar Pálsson hefur verið skipaður sýslumaður á Norðurlandi eystra. Hann gegnir nú jafnframt embætti lögreglustjóra eins og fleiri sýslumenn á landinu.

Ný lög um umdæmaskipan sýslumanna taka gildi um næstu áramót. Markmiðið er að tryggja öflugri og stærri embætti og eiga að fylgja þessum aðgerðum ný tækifæri. Innanríkisráðherra, Hanna Birna Kristjánsdóttir sagði að þessu tilefni að sýslumannsembættin séu gamalgrónar og traustar stjórnsýslu- og þjónustustofnanir. Jafnframt sagði ráðherrann að með sameiningu embætta verði til stærri, öfugri og hagkvæmari rekstrareiningar sem eru betur í stakk búnar til að takast á við ný verkefni og efla þjónustu við almenningar í landinu.

Til stendur að færa verkefni frá innanríkisráðuneytinu til sýslumannsembættanna. Jafnframt er gert ráð fyrir að verkefni flytjist að einhverju leyti frá öðrum ráðuneytum og stofnunum til embættanna. Það vekur athygli að nýjum sýslumönnum verður nú falið að undirbúa skipulag hinna nýju embætta, þjónustu þeirra, rekstur og starfsemi. Sú spurning hlýtur því að vakna, hvaða rök voru fyrir sameiningum embættanna ef nýjum sýslumönnum verður falið að vinna að uppbyggingu nýrra embætta á grundvelli markmiða sem voru notuð sem röksemd fyrir sameiningu?

Ekki hefur verið ákveðið hvar sýslumaðurinn á Norðurlandi eystra skal vera staðsettur, né aðrir sýslumenn. Það er ráðherra sem ákveður það í samráði við viðkomandi sýslumann, sveitarstjórnir, landshlutasamtök o.fl. Ákvörðunin er alltaf ráðherrans hverju sinni. Jafnframt getur ráðherra hverju sinni breytt reglugerð með lagasetningunni og því má segja að vald ráðherra sé aukið talsvert. Hinsvegar kemur fram í umræðuskjali um málið og má sjá á vef innanríkisráðuneytisins að gert er ráð fyrir því að lögreglustjórinn á Norðurlandi eystra verði á Akureyri og aðalskrifstofa sýslumannsins á Húsavík.

Við hittum Svavar Pálsson sem var í óða önn að vinna úr tækifærisleyfum vegna Mærudaga ásamt starfsfólki sínu. Hann segir að sett verði á stofn verkefnastjórn um undirbúning stofnun embættisins. Hann muni leiða þá vinnu en verkefnisstjórnin hefur ekki verið skipuð.

Svavar Pálsson, verðandi sýslumaður á Norðurlandi eystra.

Myndræn framsetning umræðuskjals innanríkisráðuneytis