Jón Björn Hákonarson gefur kost á sér í annað sæti á lista Framsóknarflokksins í NA-kjördæmi

Undirritaður hefur ákveðið að gefa kost á sér í annað sæti á lista Framsóknarflokksins í Norðausturkjördæmi vegna þingkosninga í september nk. Ég er 48 ára gamall Norðfirðingur, og er búsettur í því hverfi sveitarfélagsins Fjarðabyggðar, ásamt eiginkonu minni Hildi Völu Þorbergsdóttur og börnum okkar tveimur.

Ég hef starfað lengst af á vettvangi sveitarstjórnarmála og verið svo lánsamur að hafa fengið traust þar til fjölbreyttra verka. Ég tók sæti sem aðalmaður í bæjarstjórn Fjarðabyggðar árið 2010 og var forseti bæjarstjórnar þangað til haustið 2020 er ég tók við starfi bæjarstjóra. Afskipti mín af sveitarstjórnarmálum hófust þó fyrst á kjörtímabilinu 1994-1998 þegar ég tók fyrst sæti í nefndum á vegum sveitarfélagsins, sem þá var Neskaupstaður, og hef verið virkur á þeim vettvangi síðan. Ég hef setið í og stýrt flestum nefndum Fjarðabyggðar á þessum tíma, ásamt því að sitja í stjórnum samstarfsvettvangs sveitarfélaganna á Austurland og landsvísu. Þá hef ég einnig setið í stjórnum fyrirtækja og tekið þátt í ýmsum öðrum félagsstörfum.

Ég hef um árabil verið virkur í starfi Framsóknarflokksins. Ég var kjörinn ritari flokksins árið 2016 og í þeim störfum hef ég fengið að kynnast undirstöðum flokksins, og hef lagt mig fram við að hlúa vel að því öfluga flokkstarfi sem finna má í Framsóknarfélögum víða um land. Sú öfluga grasrót sem innan flokksins starfar er mikilvæg og ég hef stundum sagt að í henni grundvallist kjörorð samvinnunar – Máttur hinnar mörgu- sem á að vera undirstaða Framsóknarflokksins sem félagshyggjuafls.

Sveitarstjórnarmál eru mér, eins og gefur að skilja, mjög hugleikinn og þar hef ég öðlast mikla reynslu í áðurgreindum störfum mínum. Þar þarf að hafa í öndvegi að stór mál, líkt og t.d. friðlýsingar , verða ekki unnin nema í góðri sátt. Virða þarf sjálfsákvörðunarrétt sveitarfélaga og vilja þeirra íbúa sem þar búa.

Þá standa mér einnig nærri mál sem tengjast búsetu fólks á landsbyggðinni. Jöfnun búsetuskilyrða í sem víðustum skilningi er mér afar hugleikinn. Við þurfum að búa þannig um hnútana að búseta sé val, og við neyðum ekki fólk til að yfirgefa landsbyggðina vegna skorts á þjónustu eða fábrotinba atvinnutækifæra. Við verðum að nýta okkur tækniframfarir síðustu ára til að fjölga störfum á landsbyggðinni, störfum án staðsetningar, og þar getur hið opinbera gengið á undan með góðu fordæmi. Uppbygging klasasetra, til að gera fólki kleift að stunda vinnu án staðsetningar en um leið að vera þáttakandi á vinnustað, getur verið afar mikilvæg í þessu sambandi.

Einnig er mikilvægt að hlúð sé vel að því öfluga, og fjölbreytta atvinnulífi sem finna má í NA- kjördæmi. Í kjördæminu eru mörg öflug fyrirtæki á ýmsum sviðum, sem gefa þarf tækifæri til að vaxa og dafna. Við þurfum að hætta að tala um hvað horfur í landbúnaði séu góðar til framtíðar, og finna frekar leiðir til að gera hann að öflugri atvinnugrein líkt og sjávarútvegurinn er. Þá þarf að huga vel að vaxtasprotunum sem hafa verið að koma fram s.s. í fiskeldi sem í felast mikil tækifæri, og þá er efling menntunar og áframhaldandi uppbygging samgangna sem eru landsbyggðinni afar mikilvæg.

Þannig mætti lengi telja en fyrst og síðast brenn ég fyrir að vinna landi og þjóð gagn. Framsóknarflokkurinn á að vera leiðandi stjórnmálaafl í okkar kjördæmi og ég er tilbúinn til að leggja mitt af mörkum til að svo verði fái ég til þess traust framsóknarfólks þar.

Ég vonast þess vegna eftir að fá stuðning ykkar í annað sæti listans í komandi póstkosningu sem fram fer frá 1.mars til 31.mars 2021.