Íþróttamaður Húsavíkur 2013

17. feb

Íþróttamaður Húsavíkur 2013
Íþróttir - - Lestrar 774

Hulda Ósk tekur við verðlaunum sínum.

Kiwanisklúbburinn Skjálfandi heiðraði húsvískt íþróttafólk og lýst var kjöri á íþróttamanni Húsavíkur í íþróttahöllinni í gær.

Eftirfarandi kom fram hjá Agli Olgeirssyni, fulltrúa Kiwanisklúbbsins Skjálfanda, þegar hann ávarpaði íþróttafólkið og gesti í Íþróttahöllinni á sunnudaginn og lýsti kjöri íþróttamans Húsavíkur fyrir árið 2013.

“Ég vil fyrir hönd Kiwanisklúbbsins Skjálfanda bjóða ykkur velkomin til þessarar hátíðar með okkur í dag, þar sem við veitum húsvísku íþróttafólki sem skarað hefur fram úr á liðnu ári viðurkenningar fyrir framlag sitt.

Þetta er nú í 18. sinn sem við Kiwanismenn heiðrum afreksfólk í íþróttum og veitum þeim viðurkenningar með þessum hætti. Það er nefnd innan Skjálfanda sem vinnur að þessu í samræmi við reglugerð um “Íþróttamann Húsavíkur”. Regla og hefð er um hvernig stig eru gefin og er þar tekið mið af ástundun-framförum-árangri í keppni innan félags, -á héraðsvettvangi,-landsmótum -val í landslið og þáttöku í keppni fyrir Íslands hönd á mótum erlendis.

Að þessu sinni sendum við erindi til forsvarsmanna 15 íþróttagreina og óskuðum eftir tilnefningum í 30 flokka. Svör bárust frá öllum, en 4 deildir, þar á meðal Blakdeild og þrjár ungar deildir Siglinga- Motorcross og Skíðagöngudeild ÍFV ákváðu að tilnefna ekki að þessu sinni og rökstuddu það í svari sínu, og sumar deildir/félög tilnefndu aðeins í öðrum aldurs flokknum.

Í dag munum við heiðra 16 íþróttamenn fyrir afrek sín og ástundun í 12 íþrótta-greinum, auk þess verður afhendur eins og áður “Hvatningabikar ÍF” og að lokum tilkynnt um val á sæmdarheitinu “Íþróttamaður Húsavíkur 2013” úr hópi þessara 18 íþróttamanna.

Held að óhætt sé að segja að þetta hefur verið allgott íþróttaár, árið 2013 á Húsavík. Á árinu unnust þó nokkrir sigrar, en eins og gengur hafa einhverjir orðið fyrir vonbrigðum og markmið ekki náðst. Aðstaða til íþróttaiðkana hefur verið bætt, reynsla af nýja “gervigrasvellinum” er góð og hann er nýttur mikið af öllum aldurshópum. Sama má segja um nýju reiðhöllina. Vonandi verður áfram af metnaði unnið að uppbyggingu íþróttamannvirkja, og e.t.v. stutt í að við sjáum ný skíðamannvirki og nýja sundlaug ? Húsvísk íþróttaæska hefur á liðnu ári farið víða við góðan orðstír og borið uppeldis stað sínum Húsavík gott vitni um gott og öflugt mannlíf". Sagði Egill og þá var komið að því að veita okkar frábæru íþróttafólki viðurkenningar fyrir góðan og verðskuldaðan árangur á liðnu ári, og lýsa kjöri á íþróttamanni Húsavíkur 2012.

Íþróttamaður Húsavíkur 2013 var valin Hulda Ósk Jónsdóttir knattspyrnumaður úr Völsungi. Í öðru sæti var Ásgeir Sigurgeirsson knattspyrnumaður úr Völsungi og í þriðja sæti Jóna Rún Skarphéðinsdóttir Bocciamaður úr Völsungi.

Hulda Ósk Jónsdóttir Íþróttamaður Húsavíkur 2013.

Jóna Rún, Hulda Ósk og Stefán Jón sem tók við verðlaununum fyrir Ásgeir bróður sinn.

Í umsögn um Huldu Ósk segir m.a:

"Hulda Ósk er fædd 1997 og hefur æft og spilað með yngri flokkum Völsungs og nú s.l. sumar með meistaraflokki kvenna í bikarkeppni og 1. deild.

Þrátt fyrir ungan aldur var Hulda Ósk mjög atkvæðamikil á árinu 2013, hún spilaði 4 leiki með 3.flokk og skoraði í þeim 8 mörk. Hún lék stórt hlutverk í meistara-flokknum og lék alls 12 leiki í deild og bikar og skoraði í þeim 7 mörk.

Hún hefur lagt hart að sér til að ná settu marki, hefur tekið miklum framförum á liðnu ári og var valin bæði í U16 og U17 ára landslið Íslands. Hulda Ósk lék stórt hlutverk í báðum þessum landsliðum Íslands.

Hún byrjaði árið á því að spila 3 leiki með U16 ára landsliðinu og hélt svo uppteknum hætti og var valin í U17 ára landsliðið, þar sem hún spilaði 10 leiki í undankeppni EM og á Norðurlandamótinu, og skoraði í þeim 4 mörk. Flott ár hjá mjög efnilegri stúlku.

Það er því ljóst að framtíðin er björt hjá þessari unga mögnuðu knattspyrnukonu, hún er vel að þessari viðurkenningu kominn, knattspyrnumaður ársins 16 ára og yngri. og er verðugur fulltrúi húsvískra æsku sem knattspyrnumaður ársins 2013".

Í umsögn um Ásgeir segir m.a.:

Ásgeir er fæddur 1996 og hefur æft og spilað með öllum yngri flokkum Völsungs og nú s.l. sumar lék hann stórt hlutverk með meistaraflokki í 2. deild.

Hann spilaði 27 leiki í öllum keppnum sem Völsungur tók þátt í og skoraði í þeim 6 mörk. Líkt og árið 2012 lék Ásgeir stórt hlutverk í meistaraflokki Völsungs árið 2013 og átti gott knattspyrnuár.

Ásgeir er gríðarlega fljótur og áræðinn leikmaður sem skilur íþróttina mjög vel. Hann lagði hart að sér og eftir að hafa tekið miklum framförum var hann valin í U19 ára landslið Íslands,og spilaði þar stórt hlutverk m.a. á Svíþjóðarmótinu þar sem hann spilaði 3 landsleiki og skoraði í þeim 3 mörk.,

Það er því ljóst að framtíðin er björt hjá þessum unga magnaða knattspyrnumanni. Og hann er vel að þessari viðurkenningu kominn, knattspyrnumaður ársins 17 ára og eldri.

Við óskum honum áfram alls hins besta, en nýjustu fréttir af honum nú á upphafi árs, hann er að hefja sinn feril í atvinnumennsku hjá norska liðinu Stabæk".

Í umsögn um Jónu Rún segir m.a:

"Jóna Rún er íþróttamaður sem lagt hefur mikla rækt og dugnað í íþrótt sína, og með elju og árangri hefur hún nú stimplað sig inn í hóp meðal bestu Bocciamanna landsins.

Jóna Rún hefur á liðnum árum keppt á öllum Íslandsmótum og öðrum stórmótum fyrir Völsung, bæði í einstaklings og liðakeppni.

Árið 2013 hjá Jónu hefur verið viðburðarríkt. Íslandsmeistaratitli var landað ásamt liðsfélögum sínum, Linda og Lenu Kristínu í apríl sl. í annarri deild og munu þau því keppa í fyrstu deild í ár, en hún er einnig í 1. deild í einstaklingskeppni.

Á flestum stórmótum ársins hefur hún náð góðum úrslitum, og áður hefur hún unnið Opna Húsavíkurmótið.

.Á liðnu ári var Jóna valin í sex manna úrtak á landsvísu og þrír af þessum sex verða svo valdir til að keppa fyrir Íslandshönd á Norðurlandaleikum sem fara fram í Svíþjóð í maí nk. og sinnir hún æfingum af miklum móð þessa dagana, bæði hér heima og keyrir sig meðal annars reglulega inn á Akureyri á æfingar með hópnum. Sannur íþróttamaður þarna á ferð og glæsilegt boccia ár að baki hjá Jónu Rún og er hún því vel að titlinum kominn og fötluðu íþróttafólki mikil hvatning og félagi sínu Völsungi til mikils sóma".

Þá afhenti formaður Bocciadeildar Völsungs, Bragi Sigurðsson, hvatningarbikar Í.F. fyrir árið 2013 en hann hlaut Rut Guðnýjardóttir.

Bikarinn er veittur árlega þeim einstaklingi sem að mati stjórnar Bocciadeildar og þjálfara sýnir bestu ástundun og mestu framfarir. Bikarinn er farandbikar gefinn af Íþróttasambandi Fatlaðra og geymir handhafi bikarsins hann milli útnefninga.

Í umsögn um Rut sagði ma:

"Rut kom til liðs við Bocciadeildina fyrir fáum árum og hefur tekið virkan þátt starfinu bæði á æfingum og utan vallar. Og er nú að koma í hóp öflugra liðsmanna innan deildarinnar.

Hún hefur þegar sýnt miklar framfarir í íþrótt sinni, enda stundað æfingar af miklum áhuga og prúðmennsku.

Rut hefur þegar tekið þátt í flestum mótum sem í boði hafa verið hjá félaginu s.s. Húsavíkurmótum, Norðurlandsmótum, Hængsmótum á Akureyri , og Íslandsmótum. Hún hefur einnig verið viljug til annarra verka sem þurft hefur að vinna og verið virkur félagi í starfi Bocciadeildarinnar.

Árið 2013 var gott Bocciaár hjá Rut, og ætti því viðurkenningin að hljóta Hvatningabikar ÍF til varðveislu næsta ár, að vera henni mikil uppörfun og hvatning til að gera enn betur.

Rut er vel að þessari viðurkenningu kominn og er góður handhafi “Hvatningabikars ÍF “.

Eftirtaldir hlutu tilnefningu í kjöri á Íþróttamanni Húsavíkur 2013 sem og viðurkenningar í hverjum flokki og íþróttagrein:

Handknattleikur 16 ára og yngri Ásgeir Kristjánsson. Handknattleikur 17 ára og eldri Heimir Pálsson. Þeir félagar voru í keppnisferðalagi sunnan heiða og því vant viðlátnir en Hörður Jónasson tók þessa mynd af liði Völsungs fyrir leik í gær.