Höfðingleg gjöf til tækjasjóðs Sjúkrahúss Húsavíkur

Kristín A. Þórðardóttir og Kjartan Jóhannesson.

Hjónin Kjartan Jóhannesson og Kristín A. Þórðardóttir, löngum kennd við Þórðarstaði, færðu tækjasjóði Sjúkrahúss Húsavíkur höfðinglega gjöf í dag.

Um er að ræða peningagjöf upp á fimm milljónir króna sem greiðast á þessu ári. Þrjár milljónir hafa nú þegar verið lagðar inn á reikning sjóðsins og tvær milljónir verða lagðar inn þann 6. desember nk.

Ekki er öll sagan sögð því eftir þeirra dag verður afhent sú upphæð sem stendur eftir af þeirra eigum að frádregnum útfararkostnaði.

Ásgeir Böðvarsson læknir þakkaði þessa gjöf og sagði nokkur orð við það tækifæri.

“Í fyrsta lagi langar okkur fólkinu hér á stofnuninni að þakka alveg sérstaklega fyrir þessa höfðinglegu gjöf, Þetta er með ólíkindum rausnarlegt og eiginlega meira en orð fái lýst. Maður veit vart hvernig á að haga orðum sínum þegar um svona stórgafir er að ræða.

Í annan stað vil ég þakka fyrir þennann hlýhug sem fylgir gjöfinni. Það er ekkert nýtt að við finnum hlýhug frá þingeyingum en þeir hafa styrkt þessa stofnun afar vel að undanförnu. Þetta er nú satt að segja með rausnarlegra móti og heldur betur það og það er afar gott að finna þennan hlýhug.

Í þriðja lagi  vil ég sértaklega nefna það og lýsa aðdáun minni á þessari fjölskyldu, þetta er stór fjölskylda og virðingin og samheldnin í sambandi við þessa gjöf er aðdáunarverð. Og enn og aftur kærar þakkir”. Sagði Ásgeir Böðvarsson.

Kristín A. Þórðardóttir og Kjartan Jóhannesson.

Kristín og Kjartan ásamt börnum sínum. Fv. Rósa, Aðalheiður, Þórður, Ásdís, Aðalsteinn, Hulda, Sigrún og Berta. Á myndina vantar Árna.

Kristín og Kjartan ásamt fulltrúm þiggjanda gjafarinnar. Fv. Áslaug Halldórsdóttir framkvæmdastjóri hjúkrunar, Hallgrímur Hreiðarsson læknir, Guðrún K. Aðalsteinsdóttir ritari Styrktarfélags HÞ, Ásgeir Böðvarsson framkvæmdastjóri lækninga og Auður Gunnarsdóttir formaður Styrkarfélags HÞ.