Umfjöllun: Valtað yfir Sindrastúlkur

Helena Rós með boltann

Völsungsstúlkur hófu leik í 1.deildinni þetta árið á heimaleik gegn Sindra frá Höfn í Hornafirði. Hófst leikurinn rétt fyrir kristilegan kvöldmatartíma og lét sú gula sjá sig í fyrri hálfleik þótt ögn hafi kólnað í þeim síðari.

Byrjunarlið Völsungs: Anna Jónína Valgeirsdóttir, Dagbjört Ingvarsdóttir, Jóney Ósk Sigurjónsdóttir, Ásrún Ósk Einarsdóttir, Helena Rós Þórólfsdóttir, Harpa Ásgeirsdóttir(f)(Anna Halldóra Ágústsdóttir’12), Helga Björk Heiðarsdóttir(Sigrún Lilja Sigurgeirsdóttir’77), Þórunn Birna Jónsdóttir(Brynja Matthildur Brynjarsdóttir’60), Hulda Ósk Jónsdóttir, Laufey Elísa Hlynsdóttir, Ruth Ragnarsdóttir(Elma Rún Þráinsdóttir’63).

Markaskorarar: Laufey Elísa 2, Hulda Ósk 2, Helena, Helga Björk, Dagbjört, Jóney, Brynja.

Hvað á maður eiginlega að segja? Harpa fyrirliði fór meidd útaf snemma leiks eftir að hafa verið tækluð. Stuttu síðar brutum við ísinn en Helena Rós Þórólfsdóttir klíndi þá aukaspyrnu frá vítateigshorni í fjærhornið. 1-0 fyrir okkur og glæsilegt mark þarna. Ekki leið á löngu áður en stelpurnar bættu við en Ruth Ragnarsdóttir átti þá fantafína fyrirgjöf á milli varnarlínu og markmanns sem Helga Björk Heiðarsdóttir setti í fjærhornið í fyrstu snertingu. 2-0!

Gestirnir minnkuðu muninn með langskoti sem sveif yfir Önnu Jónínu og lenti rétt undir slánni. 2-1 en við vorum ekki lengi að refsa fyrir það mark því rétt fyrir hálfleikinn skeiðaði Anna Halldóra Ágústsdóttir upp völlinn og átti frábæran langan bolta frá hægri inn í teig þar sem Laufey Elísa tók við honum og kláraði svo færi sitt vel. 3-1 og þannig stóðu leikar í hálfleik.

Seinni hálfleikurinn byrjaði svipað og sá fyrri endaði og voru okkar stelpur komnar í 4-1 á 53.mínútu. Laufey Elísa bar boltann upp og lagði út á kant á Ruth sem átti fyrirgjöf sem sveif í gegnum teiginn þar sem Hulda Ósk tók hann niður. Hulda lék á varnarmann og lagði boltann út í teig á Dagbjörtu sem setti hann þéttingsfast í hornið. Nokkrum mínútum síðar breytti Hulda Ósk svo stöðunni í 5-1 eftir að hafa fengið stungusendingu, leikið á markmanninn og dúndrað boltanum í markið.

Næst kom fimm mínútna kafli þar sem Völsungsstelpur gerðu þrjú mörk. Undirritaður var svo upptekinn við að punkta niður að hann missti af seinni tveimur í þeirri hrinu og kamerumaðurinn gat aðeins rétt umlað hverjar sáu um að skora. Fyrst kom fyrirgjöf frá Ruth sem Hulda Ósk tók niður, lék inn í teig og kláraði af mikilli yfirvegun til þess að koma okkur í 6-1.

Tveimur mínútum síðar kom Jóney Ósk okkar stelpum í 7-1 með góðu langskoti áður en að Laufey Elísa breytti stöðunni í 8-1 með öðru skoti utan af velli!

Áður en að yfir lauk höfðu stelpurnar komist í 9-1 en Hulda stakk boltanum inn á Laufey Elísu sem renndi honum fyrir markið á Brynju Matthildi sem renndi knettinum í netið af stuttu færi. Dómarinn flautaði svo til leiksloka og lokatölur 9-1.

Ég veit ekki hvað meira skuli segja. Helena Rós var valin Nivea-stúlka leiksins en hún lék fantavel í vinstri bakverði til að byrja með og síðar meir á miðjunni eftir skiptingar. Dró vagninn í fyrri hálfleik með góðri aðstoð Ruthar og Laufeyjar sem sáu um að skapa flest okkar færi. Hulda Ósk var einnig kyngimögnuð í síðari hálfleik ásamt því að liðið allt var að finna sig vel. Þá keyrðu stelpurnar upp tempóið sem hafði á löngum köflum vantað í fyrri hálfleik þótt liðið væri yfir.

Ótrúlega góð byrjun á 1.deildinni hjá stelpunum og nú þurfa þær að byggja ofan á þessa flottu byrjun. Næsti leikur byrjar í stöðunni 0-0 og stelpurnar taka aðeins sjálfstraustið úr þessum leik með sér í þann næsta. Þær mega þó fagna vel í kvöld enda vel að því komnar. ÁFRAM VÖLSUNGUR!

Tengdar greinar:
Helena Rós: Tóku allir mjög vel á móti mér (myndband)
Jói Páls: Við förum í alla leiki til þess að vinna þá alveg sama hvað liðin heita